رأى الرائع جوزيه عن منتخب مصر

مانويل جوزيه مدرب النادى الاهلى كان فى ضيافة برنامج استاد النيل "للمره الثانيه" و كان معه الناقد خالد توحيد "مقدم البرنامج" و جمال الغندور رئيس لجنة التحكيم المصرى.. و سبب وجود جوزيه تحليل جميع المباريات التى انتهت فى البطوله الافريقيه حتى الان :
و اهم ما قال فى لقائه:
1- ان احسن فريق لعب لحد دلوقتى هو منتخب مصر,و ان مصر هى البطل و حامل اللقب و انها اكثر بلد افريقيه فائزه بالبطوله ل5 مرات, بجانب ان اكبر ناديين فى مصر "الاهلى و الزمالك" حاصلين على اكبر نسبة فوز بالبطولات الافريقيه للانديه,لذى يجب على اللاعيبه ان تكون لديهم الثقه فى انفسهم و اللعب بنفس المستوى و البعد عن الغرور او انخفاض المستوى الذى دائما ما يصيب اللاعب المصرى بعد الانتهاء من انجاز ما او لعب مباراه بمستوى عالى جدا..
2- قال انه يتوقع ان النهائى لا يخرج عن 2 من هذه الفرق "مصر- كودى فوار-غانا"..
3-قال ان حسن شحاته يعتبر تقديره 10/10 و اوتوفيستر 0/10 ,و ان لم يكن هناك وجه مقارنه بينهم النسبه لقيادة كل منهم لفريقه فى مبارت الكامرون و مصر..
4- قال كل لاعيبة المنتخب المصرى كانت على مستوى عالى ,و منهم من كان اقل نسبيا فى المستوى و لكن عمتا جميعهم استطاعوا القيام بمهامهم على اكمل وجه ,و ان الهدف الاول للكامرون يسأل عنه جميع اللاعيبه و بالاخص من كان فى مركز المدافعين و مهمته انه يمسك ايتو "مان تو مان",و لكن ايضا ايتو لاعب مهارى و خطير و ليس من الضرورى ان يكون سبب الهدف 100% خطاء من المدافعين فقط,فيجب ان نرجع السبب ايضا لبراعته ايتو فى احراز للهدف..
5- قال ان سونجا بداء يلعب كوره و كان جوزيه لسه طفل صغير \و قال يعنى ده هياء الجول التالت لزيدان بانه باصله الكوره بدماغه على صدر زيدان اللى تغامل ببراعه,و جاب جول رائع و استطاع استغلال خطاء سونجا ..
6- خالد توحيد سأله عن حسنى عبد ربه...جوزيه رد بان حسنى لاعب قوى هجوميا ودفاعيا و مهاريا و ان من ينظر لوجهه يرى الجديه الكامله طوال المباراه.و اضاف ان لما حسنى راح ستراسبورج كان جوزيه زعلان لان لاعب بأمكانيات حسنى افضل له ان يلعب لنادى كبير مثل الاسماعيلى داخل بلده ,افضل من انه يحترف فى نادى صغير خارج بلده,و ده بسبب انه على الاقل هيقدر يهاجم و يجيب اجوال و يبرع فى ادائه لان فريق مثل الاسماعيلى يعتبر فريق كبير لذى فحسنى يصل لمرمى الخصم اكثر من مره و بسهوله ,على عكس ستراسبورج اللى كل اللاعيبه حوليه بتدافع و الفرق بينه و بين مرمى المنافس بيكون 70 متر عشان يوصله و قال انه دائما مع لاعيبة فى البرتغال او لاعيبة الاهلى بينصحهم انهم يستمروا فى بلدهم داخل فريق كبير احسن من اختفائهم فى فرق ضعيفه خارج بلدهم حتى تأتيهم فرصه حقيقيه للاحتراف الخارجى بنادى كبير ..
7- قال ان فلافيو ادى بشكل جيد فى المباراه و استطاع ان يستخدم ذكائه لان هو ده اسلوب لعب فلافيو,و انه صنع هدف جميل جدا,و انه كان نازل للمباره لكى يفوز فقط و هو ما حاول تحقيقه طوال مباراته مع جنوب افريقيا..
-- خالد توحيد سأله لو فلافيو جاله عرض احتراف بعد امم غانا هتوافق...و كان رد جوزيه ان اصلا فلافيو كبير و عجوز وقال انا بقى مش هسيبه يخرج من الاهلى لانه تبعى و قعد يضحك",و قال باب التنقلات الشتويه فى اوروبا هتخلص 31 يناير و مش هيلحق ,و قال ده عنده 29 سنه اولا ,يعنى هيحترف امتى و هو 30 مثلا :)!!,و قال ان فلافيو عمتا مابيتكلمش خالص انه عاوز يسيب الاهلى بجانب انه مركز مع منتخب بلده و اكيد لو هو رايح غانا عشان نفسه مش عشان المنتخب يبقى هيكون رد فعل مدربه معه سلبى لان هيبان مين بيلعب لنفسه و مين بيلعب عشان منتخب بلاده..
--و لما خالد توحيد اصر على معرفة راى جوزيه لو جه عقد احتراف كبير لفلافيو... كانرد جوزيه بأن وقتها اكيد هيسيبه يحترف,و هيدور على لاعب اخر بمهارات عاليه و لكن لابد ان يكون اصغر منه سنا..
8- جمال الغندور سأله عن رايه فى قرار الجنه المنظمه بأعطاء زيدان جائزة احسن لاعب فى المباراه..و كان رد جوزيه ان زيدان هو الوحيد اللاعب اللى ماكنش يعرفه او شافه قبل كده فى منتخب مصر,و انه لاعب رائع و جاب جولين من احلى الاهداف و انه بالفعل يستحق الجائزه كأفضل لاعب و انه بيتمنى له ان يظل على نفس المستوى باقى البطوله..
9- و قال انه بيتفرج على المباريات اللى بيكون مطلوب منه تحليلها فى قناة النيل للرياضه بتركيز اكثر ويكون لوحده,لكى يكون تحليله جيد,فهو يعتبر وجهه للنادى الاهلى و انه موجود فى البرنامج بأسم النادى الاهلى و ليس بأسم مانويل جوزيه,لذلك يجب ان يكون على قدر المسئوليه لتمثيل اكبر نادى فى افريقيا و الشرق الاوسط .."و هنا قام كل المتواجدين فى الاستوديو خلف الكاميرات بتحية جوزيه و التصفيق له"
--- نقاط اخرى هامه:
- خالد توحيد فى الحلقه السابقه قبل مباراة مصر,سأل جوزيه لو كان مكان حسن شحاته كان هيفكر ازاى فى الخطه و التشكيل,و هنا رفض جوزيه الاجابه على السؤال معللا بأنه يجب عليه احترام المدربين و لا يتدخل حتى و لو بالرأى عن تشكيل او خطة مدرب ما قبل خوض المباراه او حتى بعدها,و انه لا يحب ان يفعل فى غيره ما لا يكره ان يفعله الاخرين فيه,و ان مش من الاحترام انه يتدخل فى اختيارات زميل له..
- خالد توحيد كرر اكثر من مره انه لم يكن يتوقع اكتشاف شخصية مانويل جوزيه بهذا الشكل,و قال لجوزيه انا اول مره اكتشف الجانب الانسانى و ايضا روح الدعابه التى يتمتع بها جوزيه باشكل كبير و انه سعيد جدا لوجود جوزيه معه فى البرنامج بصفه شخصيه..."علما بأن خالد توحيد كان دائم الهجوم على جوزيه فى السابق"
- و اضاف توحيد بان جوزيه ان شاء الله هييجى تانى بعد 3 او 4 ايام حسب مقدرته للتحليل على باقى البطوله,وان كلما سمحت له الفرصه ان يأتى سوف يأتى للبرنامج حتى نهاية البطوله ان شاء الله..