منتدي وسط البلد
قصائد احمد فؤاد نجم GWGt0-n1M5_651305796
منتدي وسط البلد
قصائد احمد فؤاد نجم GWGt0-n1M5_651305796
منتدي وسط البلد
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتدي وسط البلد

فكر جديد في عالم النت والكمبيوتر
 
الرئيسيةأحدث الصورالتسجيلدخول

منتدي وسط البلد :: .:: منتدى الحب والادب والشعر::. :: قسم الخواطر والأشعار
 

 قصائد احمد فؤاد نجم

اذهب الى الأسفل 
2 مشترك
كاتب الموضوعرسالة
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 5:15 am
قصائد احمد فؤاد نجم 89
احمد فؤاد نجم
زي النهار ده من كام سنه مفيش لزوم للعـد والحسبنه
اصل الحكايه عد عمرك ياجحا
قال يوم مفلس وخمسه سته عكننه
فلس ... فلس ... فلس يحيا الفلس والجدعنه
نبذه عن الشاعر احمد فؤاد نجم
البطل الثائر ملهم الجماهيرالفاجومي الشاعر الحبيب
حفظه الله وامد في عمره احمدفؤاد نجم
قالعنه الشاعرالفرنسي الكبير لويس اراجون
ان فيه قوه تسقط الاسوار
واسماه الدكتورعلي الراعيالشاعر البندقيه
الرئيس الراحل السادات يسميهالشاعر البذيء
ولقب بآخر الصعاليكالمحترمين
وبشاعر تكدير الامن العام
من مواليد مصر شرقيه
1929 ولد عام
بسبب شعره سجن ثمانيه عشرعاما
انسان بسيط قلبه ابيض قنوعاشجاعا


عدل سابقا من قبل في الإثنين 22 أكتوبر 2007, 6:58 am عدل 1 مرات
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 5:22 am
ع المحطه
ع المحطه ع المحطه واللي شفته ع المحطه
طلعت الخفه ام شنطه سلم الاتوبيس بنطه
حته ملعب والاكاده في القوام والحسن بطه
هي خشت درجه اولى والكراسي بقت منطه
سابو تانيه وغلب تانيه والقطيع على اولى خطى
اللي يهبش في الجونله واللي يعلى واللي يوطى
بص واحد م اللي همه دمهم فلفل وشطه
شاف صنايعي في البريمو قال له خش هناك ياسطى
ثانيه انسب للي زيك دي الحقيقه بلاش مغالطه
الاسطى قال له ياعم روق دي الحياه تحب المباسطه
وانت شايف مش مغمض حاجه ملبن حاجه قشطه
ولا يعني الكون ح يخرب لو فقير يلهط له لهطه
--------------------------------------------------------------------------------
زياره لضريح عبدالناصر
السكه مفروشه تيجان الفل والنرجس
والقبه صهوه فرس عليها الخضر بيبرجس
والمشربيه عرايس بتبكي
والبكا مشروع
مين دا اللي نايم وساكت
والسكات مسموع
سيدنا الحسين
والا صلاح الدين
والا الامام
دستور ياحراس المقام
ولا الكلام بالشكل ده ممنوع
على العموم انا مش ضليع في علوم الانضباط
ابويه كان مسلم صحيح
وكان غبي
وكان يصلي ع النبي
عند الغضب والانبساط
ابويا كان فلاح تعيس
في ليله ضلمه خلفوه
وف خرقه سوده لفلفوه
وف عيشه غبرا طلعوه
ولصموه
وطلسموه
ودجنوه
وجهزوه
وجوزه على عماه
فكان محير في هواه
مابين امي ومابين الجاموسه
وكان يخاف يقتل ناموسه
وكان خجول...خجول...خجول
لكنه كان دايما يقول
استغفر الله العظيم من باب الاحتياط
ابويه طلعتوه حمار
فكان طبيعي يجيبني جحش
لا اعرف نبي من اجنبي
ولا مين ماجاش ولا فين ماراحش
موسى نبي
عيسى نبي
وياقلبي صلي ع النبي
وكل وقت وله ادان
وكل عصر وله نبي
واحنا نبينا كده
من ضلعنا نابت
لامن سماهم وقع
ولا من مره شابت
ولا انخسف له القمر
ولاالنجوم غابت
ابوه صعيدي وفهم
قام طلعه ظابط
ظبط على قدنا
وع المزاج ظابط
فاجومي من جنسنا
مالوش مره سابت
فلاح قليل الحيا
اذا الكلاب عابت
ولا يطاطيش للعدا
مهما السهام صابت
عمل حاجات معجزه
وحاجات كثير خابت
وعاش ومات وسطنا
على طبعنا ثابت
وان كان جرح قلبنا
كل الجراح طابت
ولا يطولوه العدا مهمها الامور جابت
--------------------------------------------------------------------------------
شقع بقع
أنا الاديب ولا تعرفنيش
تقرا لي لكن ماتشوفنيش
كلامي لاهو مدهون ورنيش
ولا المعاني عليها غبار
شقع بقع يادليل الفار
ياشعب مصر ياخم اللنوم
ماتفوق بقى وتشوفلك يوم
والثورة قامت في الخرطوم
وانت اللى نايم بالأسرار
شقع بقع ياديل الفار
ياشعب ثور داهيه تسمك
وشيل أصول أسباب همك
عصابة بتمص في دمك
والاسم قال ضباط احرار
شقع بقع ياديل الفار
خدوا اليهود غزه وسينا
وبكرة يبقوا وسطينا
والراديوهات بتغدينا
خطب ونتعشى أشعار
شقع بقع ياديل الفار
الشيخ امام قال كلمة حق
الست ثومة قالت لك لا
وأبو النجوم على ودنه انزق
في المعتقل والدنيا نهار
شقع بقع ياديل الفار

--------------------------------------------------------------------------------
الحمد لله
الحمدلله خبطنا تحت بطاطنا
يامحلا رجعة ظباطنا من خط النار
ياأهل مصر المحمية بالحرامية
الفول كتير والطعمية والبر عمار
والعيشة معدن وأهي ماشيه آخر أشيا
مادام جنابه والحاشيه بكروش وكتار
ح تقول لي سينا وماسيناش ماتدوشناشي
ماستميت أوتوبيس ماشي شاحنين أنفار
ايه يعني لما يموت مليون أو كل الكون
العمر أصلا مش مضمون والناس أعمار
ايه يعني في العقبه جرينا ولافي سينا
هي الهزيمة تنسينا اننا احرار
ايه يعني شعب في ليل ذله ضايع كله
دا كفاية بس أما تقول له احنا الثوار
الحمد لله ولاحولا مصر الدولة
غرقانة في الكدب علاوله والشعب احتار
وكفايه أسيادنا البعدا عايشين سعدا
بفضل ناس تملا المعده وتقول اشعار
أشعار تمجد وتماين حتى الخاين
وان شاء الله يخربها مداين عبد الجبار

--------------------------------------------------------------------------------
بيان هام
هنا شقلبان محطة اذاعة حلاوة زمان
من القاهره ومن كردفان
وسائر بلاد العرب
واليابان
ومن فنزويلا
وايضا ايران
ومن اي دار
أو بلد مستباحه
بفعل السياحه
مع الأمريكان
هنا شقلبان
محطة اذاعة حلاوة زمان
نقدم اليكم بكل الللغات
مراسح وسيما وجميع الفنون
صحافه ومنابر
وتليفزيونات
وخطبا ف جوامع
وجبنه و زيتون
ونقزح ونركب جميع الموجات
ونبحث ونفهم
في كل الشئون
ودايما نلعلع في كل الحالات
ولاحد سامع
ولايحزنون
وتسمع ماتسمع
دا ما يهمناش
لأن احنا أصلا
بناكل بلاش
فخليك في نفسك
وماتخليناش
نسلط عليك القلم
واللسان
***
هنا شقلبان محطة اذاعه حلاوة زمان
يسر الاذاعه
ومايسركوش
بهذي المناسبه
وما بندعيكوش
نقدم اليكم
ولاتقرفوش
شحاته المعسل
بدون الرتوش
شبندر سماسرة بلاد العمار
معمر جراسن للعب القمار
وخارب مزارع
وتاجر خضار
وعقبال أملتك
أمير الجيوش
ماتقدرش تنكر
تقول ما اعرفوش
ما تقدرش ايضا
تقول ما اسمعوش
شحاته العسل
حبيب القلوب
يزيل البقع
والهموم والكروب
يأنفس
يأفين
يبلبع حبوب
ويفضل يهلفط
ولاتفهموش
وتفهم ما تفهم
دا ما يهمناش
لأن انت فاهم
وعامل طناش
ح تنكر وتحلف
ح أقول لك بلاش
ح تلعب دماغنا
وتتعب كمان
***
هنا شقلبان
محطة اذاعه حلاوة زمان
لأن المخبي ظهر واستبان
وكل المسائل
بدت للعيان
وطلعت حكاوي
ونزلت كمان
عن التهريبه
وعن كيت وكان
وعن محسوبيه
وعن ألعبان
ظهر في المدينه
كأنه طوفان
وغرق مراكب
وسوح غيطان
وبعض المراكب
ح تغرق كمان
وأزمة مساكن
وأزمة أمان
وعالم بياكل
في عالم جعان
وريحة مؤامره
في جو المكان
مخطط خيانه
مع الامريكان
لدبح العشيره
وحرق الجيران
وفيه ناس بترغي
ولازم بيان
كما أبلغونا
جميع الودان
لهذا وذاكا.. وتلكم كمان
نقدم اليكم
عروسة وحصان
شحاته المعسل
وهذا البيان
***
هنا شقلبان
محطة اذاعة حلاوة زمان
بسم الله
سلام عليكم
وسلمون وموز
وأما المسائل
فهنجف ولوز
فيا اخوتي
ويا اخوات
اليكم بياني
كما هو آت
***
جميع المسائل
تمام التمام
وكل الكلام دا
مجرد كلام
فصبرا جميلا
ولاتقلقوش
وشغل الضغاين
أنا ما اقبلوش
مافيش أي حاجه
على الطلاق والعتاق بالتلاته
مافيه اي حاجه
وقدر كمان ان فيه أي حاجه
مافيش اي حاجه
ما لوش أـي لازمه الكلام
واللجاجه
وعيب ان عيل يسوق السماجه
ويعمل لي باللو
ويعمل ديباجه
أنا بطبعي ضد السماسره الكبار
بحكم المنافسه
وحكم الجوار
لكن مش ف طبعي
اني أعمل فضيحه
لواحد زميلي
هبش كام صفيحه
ما كل الزمايل
بتهبش صفايح
وكل اللي جاي
ماشي زي اللي رايح
فيا ايها الشعب
صهين تفلعص
مسا التنفس
مساء الروايح
***
أخويا الامير بزرميط الايراني
بعت لي السنه دي
عزمني ودعاني
أنا قبلت طبعا
ورحنا العزومه
وكانت وليمه
ماتحصلش تاني
دا ايه المحمر
وايه المكمر
وايه المشمر
وايه الصواني
وأنا دماغي تعبت
ولفت صراحه
من الفخفخه
والهنا الأصفهاني
هناك يعني مثلا
اذا شربت طافيه
تمز بكوارع
وبسطرمه ضاني
ماشفتش هناك
ناس بتحقد عليهم
ولاناس بتشتم
فلان الفلاني
لأنه اشترى عزبتين
من شطارته
وحكمة ارادته
وطلع مباني
وبعد الوليمه استلمنا الهدايا
مفضض
ومدهب
وقز وقيشاني
وطبعا أخويا الأمير
قال لي حاجه
ح اقولهالكو طبعا
اذا الوقت ناسب
ح يطلع لي عيل
بدون اي حاجه
ويعمل لي فلحس
ويقعد يحاسب
دا حقد اشتراكي أنا مااقبلوش
ولو هو ابني انا ما اعتقوش
***
كلام عن سماسره
كلام عن دعاره
حاجات مش صحيحه
جمل مستعارة
وعايزين يخلوا البلد
أردغانه
وعايزيني اسيب البلد
من زمان
وانا مش ح اسلم
واسيب الامان
ولا بالبوليس والنيابه كمان
فيا ايها الشعب
كمل جميلك
وصبرا
والزم حتيجي المصاري
وتأكل وتشرب
تبع ما يآتيلك
وتغرق في بحر العبيد والجواري
وترسم حياتك
حسب مايرائيلك
وتملا الحواري
فساقي وقصاري
تسبح بحمدك
وتشكر جميلك
وفضل الزباله
وطفح المجاري
ختاما سلاما
وآخر كلاما
ضرورا
يسود الهدوء والوئاما
فماذا والا
ح طربقها واللا
اهرب فلوسي
واسافر قواما
سلام عليكم
وسلمون وموز
بصفتي رئيسا
وأبا
وجوز
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 5:29 am
موال الفول واللحمة
عن موضوع الفول واللحمة صرح مصدر قال مسئول
ان الطب اتقدم جدا والدكتور محسن بيقول
ان الشعب المصري خصوصا من مصلحته يقرش فول
حيث الفول المصري عموما يجعل من بني ادم غول
تأكل فخده في ربع زكيبه والدكتور محسن مسئول
يديك طاقة وقوة عجيبة تسمن جدا تبقى مهول
ثم اضاف الدكتور محسن ان اللحمه دي سم أكيد
بتزود أوجاع المعدة وتعود على طولة الايد
وتنيم بني ادم وتفرقع منه المواعيد
واللي بياكلوا اللحمة عموما حيخشوا جهنم تأبيد
يادكتور محسن يامزقلط يامصدر ياغير مسئول
حيث ان انتو عقول العالم والعالم محتاج لعقول
مارأى جنابك وجنابهم فيه واحد مجنون بيقول
احنا سيبونا نموت باللحمة وانتو تعيشوا وتاكلوا الفول
مارأيك ياكابتن محسن مش بالذمة كلام معقول

--------------------------------------------------------------------------------
قصيده كلب الست
في الزمالك من سنين،وف حمى النيل العظيم،قصرمن عصر اليمين،
ملك وحده م الحريم،صيتها اعلى م الآذان،يسمعوه المسلمين
والتتر والتركمان ،والهنود والمنبوذين .
ست فاقت ع الرجال في المقام والاحترام
صيت وشهره وتل مال،يعني في غايه التمام،
قصره يعني هيه كلمه، ليها كلمه ف الحكومه
بس ربك لجل حكمه قام حرمها م الامومه
والامومه طبع ثابت جوا حواء من زمان
تعمل ايه الست جابت فوكس رومي وله ودان
فوكس ده عبقال املتك عنده دسته خدامين
يعني مش موجود في عيلتك شخص زيه ياسماعين
واسماعين دا يبقى واحد م الجماعه التعبانين
اللي داخو في المعاهد والمدارس من سنين
حب يعمل واد فكاكه ويمشي حبه في الزمالك
والقيامه والفتاكه يرموا طبعا ع المهالك
عم سمعه من قيامته حب يعمل فيها فله
بعد ما الوظ بيجامته اشترى حته مجله
قول مشي يقرا ف حكايه من حكايات الغرام
واندماجه في القرايه خلا مشيه مش تمام
ع اليمين يحدف بعيد خطوتين ويروح شمال
لمحه فوكس من الحديد قال دا صيد سهل وحلال
هوب نط ف كرشه دوغري جاب بجامته لحد ديلها
اسماعيل بدال مايجري قال يارجلي رجلي مالها
بص شاف الدم سايح من عاليها ومن واطيها
وياللي جاي وياللي رايح المجله مش لاقيها
حبه واتلموا الظنايا اللي هما البوابين
والهكايه والروايه قال لهم دا كلب مين
(البوابين... من بلاد النوبه وينطقون حرف الحا هاء )
كلب مين ماكلب ماكلب مينشي سمعه لبخ حبتين
قال له واحد منهم امشي الي جابك عنده مين
قال دا شارع يامواشي والجميع بيمر منه
اللي راكب واللي ماشي مستحيل نستغنى عنه
كلمه من دا وكلمه من دا ظاطو واترسمت فضيحه
قول نهايته والقصد من ده اسماعين اكل الطريحه
راحوا قسم الشرطه طبعا والنيابه كفيله بيهم
واترموا في الحجز جمعا لما ييجي الدور عليهم
حبه والشاويش امين قال سعيد النقشبندي
قام غريم عم اسماعين قاله محسوبك يافندي
قام سي سمعه يروح معاه الشاويش قال غور بدمك
وفوق قفاه كف طرقع ... داهيه ف امك
تفتكر يفضل سي سمعه قد ايه في القسم نايم
استضافه الحجز جمعه يابلاش آدي العزايم
شاف بلاوي ماتتحكيش م الديابه المسجونين
قال ياعالم ياشاويش يانيابه يامسؤوليين
خلصوه بعد المناهده جثه من جحر الديابه
هيه يمكن ساعه واحده كان في مكتب النيابه
قال له مالك ياسماعين.. قال له زي البمب مالي
قال له عضك فوكس فين قال له سيبني اروح لحالي
انت شوف سي فوكس يمكن خد تسمم غصب عني
الوكيل قال برضه ممكن والشاويش قعد يغني
انت فين والكلب فين انت قده يااسمماعين
طب دا كلب الست يابني وانت تطلع ابن مين
بشرى لصحاب الديول واللي له اربع رجول
بشرى لا سيادنا البهايم من جمايس او عجول
اللي صاحبه ياجماعه له غناوي في الاذاعه
راح يدوس فوق الغلابه والنيابه بالتباعه
انت تسوى في النيابه تسعميه م الغلابه
طب ياريت يافوكس كنا ولا تربطنا القرابه
هيص ياكلب الست هيص لك مقامك في البوليس
بكره تتولف وزاره للكلاب ياخدوك رئيس
--------------------------------------------------------------------------------
نويت اصلي صرصور دخل لي هر شلي مخي قعدت افلي
وشوشني قلي شوف القزازه فيها اللزازه دوقلك شويه ياانت يلي
مصمص شفايفك ماحد شايفك ومزمز بكاسك روق تمللي
فضلت أفكر اسكر ما اسكر الله اكبر الفجر بان لي
حليت رباطي من تحت باطي لا قدرت اطاطي ولا طلت اعلي
صرصور شيطاني قفل وداني مااقدرش ياني رويتلي غلي
حيران ياحالي سهران ليالي وسنين بقالي مربوط ف ضلي
وسألت قال لي شيخنا المصلي اركع ترتا اسجد ترللي
يارب ياللي يارب ياللي زرعت عودي سارح تمللي
وعدلت ضهري على سرج مهري وطبعت زهري على خد خللى
وحياه ماعشقي متعب ومشقي مهمن جرالي مهمن حصل لي
لاوهب حياتي واوصل صلاتي والآتي آتي ف يوم تجللي

--------------------------------------------------------------------------------
تل الزعتر
يا حكاية كل الناس
من قلب الناس للناس
تصحي علي لسان الناس
وتبات في ضمير الناس
يا أطهر جرح
وأشرف جرح
وأرجع جرح ف قلب الناس
يا تل الزعتر

--------------------------------------------------------------------------------
[size=18] رجعوا التلامذة[/size]
رجعوا التلامذة
يا عم حمزه
للجد تاني
يا مصر إنتي اللي باقية وانتي
قطف الأماني
لا كوره نفعت
ولا أونطه
ولا المناقشة وجدل بيزنطة
ولا الصحافة
والصحفجيه
شاغلين شبابنا
عن القضية
قيمولنا صهبه
يا صهبجية
ودوقونا طعم الأغاني
رجعوا التلامذه
للجد تاني
طلعوا التلامذه
ورد الجناين
إسمع يا ميلص
وشوف وعاين
ملعون أبوك ابن كلب خاين
يا صوت أميركا
يا أمريكاني

--------------------------------------------------------------------------------
النقطة
علشان لا حباب
وصاحبها
واحد نصاب
دا معلم
أبدا كداب
وبيكسب
من غير أسباب
والصحبة
خنازير وكلاب
وأنا وأنت
نطلع م الباب
سلام يا جدع
لا صوت يعلو فوق صوت المعركة
كل الجهود كل الزنود للمعركة
ألحان جنان تعزف نشيد المعركة
وكمان لجان عشان عيون المعركة
سلام يا واد للست معمع معركة
وكمان سلام لأهل بيت المعركة
سندات جهاد جداد عشان المعركة
لازمن جميع الناس يساعدوا المعركة
طبعا جميع الناس يساعدوا المعركة
مخلوق مفيش إن لم يعيش للمعركة
واموت قتيل ولا فيش بديل للمعركة
حاكم ضروري وإن حتماً معركة
طبعا ضروري وإن حتما معركه
سلام علشان لأن حتما معركة
خطاب خطير يشرح مصير المعركة
عشرين خطاب كمان عشان المعركة
جندنا جيش مليون عشان المعركة
جندتوا ديشيلون عشان المعركة
وخبزنا عيش اسود عشان المعركة
وأكلنا عيش اسود بلون المعركة
الشعب جاع الشعب صاع دي معركة
نجوع نصوع راضيين عشان المعركة
إذ إن بن تن ترن المعركة
هرشت مخي هي فين المعركة
إخرس يا واد واهتف لتحيا المعركة
أهتف لإية مش لما اشوف المعركة
إمسك بوليس جاسوس خسيس
ما سمعتناش بنقول ياتيس
لا صوت يعلو فوق صوت المعركة
إهتف يا واد لا صوت يعلو
هي فين المعركة
اهتف يا واد لا عوت يصلو
هي عين المفركة
يا همبكا في البمبكا
علي بمبكا في الهمبكة
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 5:34 am
الفوازير
شاعر بيتخن من بوزه
ممكن تخوف به عيالك
نازل يقزقز أزا أوزو
حتتك يمينك وشمالك
بقي مليونير
واللي يعوزه
يلقاه في إيده
عقبالك
وخلي بالك من زوزو
وخلي زوزو من بالك
------------
يا ولية عيب اختشي
ياشبة إيد الهون
دانتي اللي زيك مشي
يامرضعة قلاوون
مدحتي عشرين ملك
وميت وزير ورئيس
مروان
وعبد الملك
والمفتري
وعتريس
بتغني بالزمبلك ؟
ولا انتي صوت إبليس
من أول المبتدأ
حتي نهاية الكون؟
-------------
اللورد بن اللورد بن اللورد
ابن اللورد
متأصل في الثروة
لا أونا سيس
ولا فورد
حيطبق بسلامته
قوانين لا شتراكيه
ويدافع (( من عشمه ))
عن صوت الحريه
واهي كوسه
علي باميا
علي قرع استامبوللي
بتفرع يا بلدنا
علي وش التسقيه
----------
سكرتير عموم مصر
وافهم كلامي
تعدد مناصبه
ولا تنتهيش
وجيه بالوراثه
وجاهل عصامي
جمع جهل طايل
وإيه ؟
من مفيش
وكان أصله ظابط
وحول حرامي
ويكتب أدب
بس ما يتقريش
---------------
لماليمو الشخلوعه
الدلوعه الكتكوت
الليله حيتنهد
ويغني ويموت
يشيلوه قال علي لندن
علشان جده هناك
من بعد ما يتلايم
علي دخل الشباك
ويهرب أموالك
ويقولك أهواك
يا شعب يا متلوع
ع الهدمة وع القوت
-------------
ينسونه المتبعتر
ما لقاش أب يلمه
إبن امه
بس امه كانت اجدع من أمه
باع نفسه بخسارة
ما قابلش المعايرجي
كان مالك أفكاره
واتعين تفكيرجي
والحاجه اللي تحير
طب إيه اللي اتغير
كان كاتب سرايرجي
واتحول شماشرجي
------------
يكون في عون الصحافه
الله يكون في العون
لمالك يا دود القرافة
يا رمه يا ملعون
ينهش لحوم الفرايس
في الضلمه
يا وطواط
والكلمه عندك بضاعة
أما الشرف مطاط
بريئه منك بلدنا
مسلمين واقباط
ولا انت موسي
ولا انت
من كلاب فرعون
------------
مجاول وشاعر
وبياع ملوحه
وتاجر غناوي
وسمسار بنات
نعيمه وزكيه وعطيات وتوحه
ومخبر مودك
علي التجريرات
حضر من بلدهم
بمقطف ملوحه
جبر
واشتراله
تلات تاكسيهات
يتوب علي دي البلد
منك وأمثالك
ما عدش لينا جلد
علي سو أفعالك
الفن للمعركه
عبيته في البلا ليص
وصحافة المعركه
في الكدب والتهجيص
ومليت طريق الهرم
يا عرص
بالتعريص
ما دام ما فيش للهرم
صاحب
هنيا لك
-------------------
لأن الصراحه ف بلدنا قليله
بفضل المباحث
وأدب الرموز
جعلها اللئيم ابن بنت اللئيمه
شعار يرمي تحته السموم كيف يعوز
وبهدل اصول
الصراحة العظيمه
وخلا الندوب
في الحقايق
يزور
وحرم وحلل
وكتر وقلل
وسمى القبيله الذليله
حليمه
وقال ع السكوت ع الهزيمه
يجوز ؟

--------------------------------------------------------------------------------
التحالف
يعيش أهل بلدي
وبينهم ما فيش
تعارف
يخلي التحالف يعيش
تعيش كل طايفه
من التانيه خايفه
وتنزل ستاير بداير وشيش
لكن في الموالد
يا شعبي يا خالد
بنتلم صحبه
ونهتف .. يعيش
يعيش أهل بلدي
يعيش المثقف على مقهى ريش
يعيش يعيش يعيش
محفلط مزفلط كتير كلام
عديم الممارسه
يحب الزحام
بكام كلمه فاضيه
وكام اصطلاح
يفبرك حلول المشاكل قوام
يعيش المثقف
يعيش يعيش يعيش
يعيش أهل بلدي
يعيش التنابله
في حي الزمالك
وحي الزمالك
مسالك مسالك
تحاول تفكر تهوب هناك
تودر حياتك
بلاش المهالك
لذلك
إذا عزت توصف حياتهم
تقول الحياه عندنا
مش كذلك
وممكن تشوفهم في وسط المدينه
إذا مر جنبك
أوتوبيل سفينه
قفاهم عجينه
كروشهم سمينه
جلودهم بتضوي
دماغهم تخينه
سنانهم مبارد تفوت في الجليد
مافيش سخن بارد
بياكلوا الحديد
ما دام نهر وارد
وجاي م الصعيد
تزيد الموارد
كروشهم تزيد
وتسمع وتسلم
بأن التنابله
أو الأكالين
حيسمح كبيرهم
ويعمل مقابله
مع الفلاحين
ويحصل تحالف
ما بين الجميع
ونملا المصارف
بدم القطيع
أطيع الخليفه
أطيع والديك
أطيع التنابله
دا مفروض عليك
وتزرع وتبعت لحي الزمالك
وحي الزمالك
مسالك مسالك
تحاول تفكر تهوب هناك
تودر حياتك
بلاش المهالك
لذلك
إذا حد جاب لك سيرتهم
تبسمل تكبر
وتهتف كذلك
يعيك التنابله
يعيش يعيش يعيش
يعيش أهل بلدي
يعيش الغلابه
في طي النجوع
نهارهم سحابه
وليلهم دموع
سواعد هزيله
لكن فيها حيله
تبدر تخضر جفاف الربوع
مكن شغل كايرو
مايتعبش دايره
لا ياكل
ولا حتى يقدر يجوع
يا غلبان بلدنا
يا فلاح يا صانع
يا شحم السواقي
يا فحم المصانع
يا منتج
يا مبهج
يا آخر حلاوه
يا هادي
يا راضي
يا عاقل
يا قانع
ما تتعبش عقلك
في شغل السياسة
وشوف انت شغلك
بهمه وحماسه
وعود عيالك فضيلة الرضا
لأن احنا طبعا
عبيد القضا
ورزقك ورزقي ورزق الكلاب
دا موضوع مؤجل ليوم الحساب
كمان الصحافه
حتكتب في حالتك
وتنشر مناظر لخالك وخالتك
وتطلع يا مسعد عليك الغناوي
وتسمع بإسمك
في قلب القهاوي
تحبك مشيره وبنات الجزيره
وقصة غرامك
تشيع في الرداوي
يعيش عم مسعد
يعيش يعيش يعيش
يعيش أهل بلدي

--------------------------------------------------------------------------------

صباح الخير
الاغنيه
الكلمات
صباح الخير علي الورد اللي فتح
في جناين مصر
صباح العندليب يشدي
بألحان السبوع يا مصر
صباح الدايه واللفه
ورش الملح في الزفه
صباح يطلع بأعلامنا
من القلعه لباب النصر
سلامتك يامه يا مهره
يا حباله
يا ولاده
يا ست الكل يا طاهره
سلامتك
من آلام الحيض
من الحرمان
من القهره
سلامة نهدك المرضع
سلامة بطنك الخضرا
هناكي وفرحة الوالدة
تضمي الولد
يا والده
يصونهم لك
ويحميهم
يكترهم
يخليهم
يجمع شملهم
بيكي
يتمم فرحتك
بيهم
صباح الخير علي ولادك
صباح الياسمين والفل
تعيشي ويفنوا حسادك
ويسقوهم
كاسات الذل
وبلغ يا سمير غطاس
يا ضيف المعتقل سنوي
بصوتك دا اللي
كله نحاس
صباح الخير
على الثانوي
وأهلا بيكو في القلعه
وباللي في الطريق جايين
ما دامت مصر ولاده
وفيها الطلق والعاده
حتفضل شمسها طالعه
برغم القلعه
والزنازين

--------------------------------------------------------------------------------
شيد قصورك
شيد قصورك ع المزارع
من كدنا وعمل إدينا
والخمارات جنب المصانع
والسجن مطرح الجنينه
واطلق كلابك
في الشوارع
واقفل زنازينك
علينا
وقل نومنا في المضاجع
ادي احنا
نمنا ما اشتهينا
واتقل علينا بالمواجع
احنا اتوجعنا
واكتفينا
وعرفنا
مين سبب جراحنا
وعرفنا روحنا
والتقينا
عمال وفلاحين
وطلبه
دقت ساعتنا
وابتداينا
نسلك طريق
ما لهش طريق
ما لهش راجع
والنصر قرب من عنينا
النصر أقرب
من إدينا
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 5:38 am

رساله
واه يا عبد الودود
يا رابص ع الحدود
ومحافظ ع النظام
كيفك يا واد صحيح
عسى الله تكون مليح
وراجب للأمام
ع اجولك وانت خابر
كل الجضية عاد
ولسه دم خيك
ما شرباش التراب
حسك عينك
تزحزح يدك عن الزناد
خليك يا عبده راصد
لساعة الحساب
آن الأوان يا ولدي
ما عاد الا المعاد
أمك ع تدعي ليك
وع تسلم عليك
وتجول بعد السلام
خليك ددع لابوك
ليجولوا منين دا بوك
ويمصخوا الكلام
واه عبد الودود
تنفض الشركه واصل
وينزحوا الكلاب
إن كنت ود ابوك
تديب لي
تار اخوك
والأهل يبلغوك
دميعا السلام
واه با عبد الودود
كيفك وكيف زمايلك
عسى الله طيبين
خالك زناتي
داي لك
ضمن المتطوعين
واختك تطلع يوماتي
ع المشتشفى الجديمه
حاكم ع يمرنوها
في العركه تكون حكيمه
ومحمدين موافي
يتعلم المطافي
ويجولك شد عزمك
ويجولك العوافي
ومن هنا الجرايب
والعيله والعيال
ع يبلغوك سلامهم
ولتمة الرجال
وآخر الكلام
نجول لك في الختام
الله يصون بلدنا
ويحرس السلام
والدك حسن محارب
غفير برج الحمام

--------------------------------------------------------------------------------
انا اتوب عن حبك ؟
أنا اتوب عن حبك أنا ؟
أنا لي ف بعدك هنا ؟
دنا بترجاك
الله يجازيك
يا شاغلني معاك
وشاغلني عليك
وان غبت سنه
أنا برضه أنا
لا اقدر أنساك
ولا لي غنا
ولا اتوب
عن حبك أنا
زي ما يحلالك
زي هواك
سهرني عليك
سهرني معاك
دنا عمري ما اخاف من هجرك يوم
ولا قلبي بيفرح ونا وياك
وان كان أمل العشاق القرب
وأنا أملي ف حبك
هو الحب
وان غبت سنه
أنا برضه أنا
لا اقدر أنساك
ولا لي غنا
ولا اتوب عن حبك انا
أنا لا اتمنيت
ولا قلت يا ريت

ولا بعدك عني
جعلني سليت
دنا كل منايا أدوق اللوم
ويقولوا علي الناس
حبيت
وان كان أمل العشاق القرب
وأنا أملي ف حبك
هو الحب
وان غبت سنه
أنا برضه أنا
لا أقدر أنساك
ولا لي غنا
ولا اتوب عن حبك أنا
تخاصمني كتير
نصالحني كتير
كل دا يا حبيبي ما لوش تأثير
توصلني سنين
تهجرني سنين
ما تغيرنيش
دنا حبي كبير
وان كان أمل العشاق القرب
أنا أملي في حبك
هو الحب
وان غبت سنه
أنا برضه أنا
لا اقدر انساك
ولا لي غنا
ولا اتوب
عن حبك أنا

--------------------------------------------------------------------------------
املالي
إملالي املالي املالي
واسقيني الود الغالي
دنا شفت كتير يا حبيبي
في البعد وياما جرالي
إملالي املالي املالي
إسقيني الود حلاوه
علي قد عذابي ماطال
يزداد العمر غلاوه
وتزيد الدنيا جمال
دنا عز الشوق
ما كواني
والبال
جابني ووداني
كان عندي أمل ياحبيبي
نرجع نتقابل تاني
إملالي املالي املالي
دفه قابلتك يا نعيمي
صدفه ولا ألف ميعاد
إحكي لي وقول يا نديمي
عن حالك واحنا بعاد
إزاي كان قلبك خالي
وازاي كان بالك سالي
علي قد ما تقدر طول
دا الوقت معاك يحلا لي
إملالي املالي املالي
يا ليالي الشوق يا طويله
دوبتي العمر حنين
وعد ومكتوب
ولا حيله
وحنشكي الوعد لمين
كان دا المقسوم يجرا لي
ولا ادوق النوم
يا ليالي
واسهر على قد نصيبي
عطشان للود الغالي
إملالي املالي املالي

--------------------------------------------------------------------------------
غنوة سلام
قد إيه القلب يعشق
لو سمع غنوة سلام
يا سلام
قد إيه والغنوه تحلا
لو بدينا بالسلام
يا سلام
قد إيه الروح تميل
والنغم يطلع جميل
والوتر يوصل كلامه
للقلوب
صافي وأصيل
قد إيه
وقد إيه
بس اقول إيه ولا إيه
السلام دا كلمه خضرا
زي أوراق الريحان
ترتوي منها الشفايف
لما تجري
ع اللسان
زوقوكي الناس يا دنيا
بالكلام عن السلام
والكلام غير الحقيقه
والعمل غير الكلام
يا سلام
من هنا نبدى الكلام
يا صبابه يا مغرمين
كلنا نحب السلام
والسلام بيحب مين
السلام بيحب نورا
وشوفوا نورا
تبقى مين
نورا بنت عيونها خضرا
زي قلب العاشقين
والخدود ورديه خمري
والشفايف توت وتين
والضفاير
تبر طاير
يبعت النور
والرنين
والنهود حراس مدينه
بالبنادق سهرانين
يحرسوا قلب المدينه
من عيون البصاصين

--------------------------------------------------------------------------------
قل اعوزو
قل اعوزو مد بوزو الجبان ابن الجبانه
كل غدانا قام لقانا شعب طيب كل عشانا

--------------------------------------------------------------------------------
الخواجه الامريكاني
والسماسره اللي وراه
تخنوا بالكدب ودنه
وعرضوا له مقاس قفاه
فهموه
من غير مايفهم
ان سوق الشرق مغنم
والخواجه بطبعه مغشم
والمصاري معفرتاه
حب يعمل فيها تاجر
وانطلق
يسلب وينهب
ف الزباين بالنهار
يحدف الدولار يلمه
تلتميت مليون دولار
بالقزايز و البنات
باللبان
والبمبونات
بالمدافع والدانات
او بافلام الرعاه
قول بقى تاجر وفاجر
...
وانفلت لص المواشي
رعب ماشي في البلاد
يشفط البترول ويطرش
كل الوان الفساد
عزرائيل من غير فرامل
يقلب العرسان ارامل
حتى في بطون الحوامل
كان بيدبح الحياه
بالسناكي والخناجر
والنهايه ياخواجه
مش ف يوم كانت بدايه؟
البدايه برضه لازم
بيجي يوم
توصل نهايه
مهما زاد الرأسمال
الهلاك هو المال
والتاريخ
هو اللي قال
لعبة الموت في الحياه
تسحب الروح م الخناجر
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 5:40 am
عزه
الغرام في الدم سارح
والهوى
طارح معزه
والحنين للقرب بارح
والنوى جارح
ياعزه
ياابتسامة فجر هلت
بددت ليلي الحزين
ياندى الصبح الللي سأسأ
فوق خدودي الدبلانين
بل شوقهم
صحى لون الورد فوقهم
كل خد
وشم ورده
مين يدوقهم
غيرك انتي
ومين سواكي
ياحياتي
ياملاكي
يانسيم الحب لما هب
هز القلب هزه
ياهوى الاحلام ياعزه
...
الليلادي جم خدوني ياملاكي
جوز تنابله
ونص دسته
من التيران
كنت باحلم ياحبيبتي
كنت باحلم
بيكي انتي
كنا قال
انا وانتي قال
ف جنينه خضرا
ومحاوطها البرتقان
والسيسبان
وانتي جوا قرنفلايه
بالعبير بتستحمي
اجري يمك ياهوايا
تسبقيني وتجري يمي
أحضنك
واشرب عبيرك
من شفايفك
والغصون
واقفه وشايفه
بتراعينا
بس خايفه م العيون
والعيون بتقول كلام
والكلام
طاير حمام
بينادينا بالاغاني
ويهادينا بالسلام
كنت بحلم ياحبيبتي
كنت باحلم
بيكي انتي
ايوه انتي
ومين سواكي
ياحياتي
ياملاكي
يانسيم الحب لما هب
هز القلب هزه
ياهوى الاحلام ياعزه
وانطلق في الجو فجأه
ياحبيبتي
صوت مفاجأه
صوت يخلي الدم يجمد
اصحى يا احمد
اصحى يااحمد
وانتهى الحلم الجميل
وابتدا الهم التقيل
_ فين امام
_ انتوا مين
_ احنا ناس مكلفين
تيجي سالك مش ح تتعب
واحنا طبعا معذورين
_ انتو دود الارض
واللآفه المخيفه
انتو ذرة رمل
في عيون الخليفه
انتو كرباج المظالم
والمآسي
انتو عله ف جسم بلدي
انتو جيفه
_ سكتوه ابن الكلاب
سففوه من التراب
فتشوا كل الاماكن
طلعوا رفوف الدولاب
...
كمموني يا حبيبتي
كتفوني يا حبيبتي
قوموني..قعدوني
كل شعره في جسمي
بالعين فتشوها
المخده من جنانهم
شرحوها
وانتهى التفتيش
مافيش
صدقيني
ماتخافيش
هو فيه ياعزه عندي ممنوعات
غير باحب الناس
وباكره السكات؟
...
بص واحد من التنابله
جوا عيني
وانتي عارفه
عنيه صافيه وطيبين
زي كل عيون بلدنا يا حبيبتي
شباكين
ع القلب دوغري موصلين
كان مناه يلمح علامة خوف بسيطه
طب حييجي الخوف منين ابن
العبيطه
هو مين فينا الجبان
ولامين فينا الللي خان
اللي قلبه بالمحبه و بالاماني
وبالربيع لاخضر مزهر
والاغاني
ولاكلب الصيد
واسياده الاباطره
أكالين لحم البشر
فوق الصواني؟
هو مين فينا الجبان
ولامين فينا اللي خان
هو بص في عيني بصه
ارتجف وف حلقه غصه
واتعوج ومال وقال
جملتين مش مفهومين
أصله شاف صورتين جمال
في العيون الطيبين
مصر في العين الشمال
وانتي في العين اليمين
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 5:42 am
اغنية هزار
عزوز النوز
كوا النوز
مناخيرك
مش قد الكوز
مع ذلك
دايما تتعارك
مع نجمك
مع انه يجوز
ييجي مره يزرجن
ويلبك
على أم دماغك
بالشوز
حتبلضم
حيلبك تاني
ح تعيط
وحتفقع بوز
ماتهونش على يا روح
قلبي
أنا أصل متيم وعجوز
وباحبك أكتر من عيني
وباعزك اكتر ماتعوز
فحاصالحك
غصبن عن عيني
تتعزز تاني ياعزوز
أزهق من عندك
ورزالتك
أنزل على " باتا "
واجيب شوز

--------------------------------------------------------------------------------
النيل العطشان
هربت هذه القصيدة من سجن الاستئناف الى الرفيقات المعتقلات بسجن القناطر
النيل عطشان يا صبايا
للحب والحنين
والشط
لا نور
ولانسمه
ولاناي
ولا عود ياسمين
...
يا شاهنده و خبرينا
يا ام الصوت الحزين
يا ام العيون جناين
يرمح فيها الهجين
ايش لون سجن القناطر
ايش لون السجانين
ايش لون الصحبه معاكي
نوار البساتين
كلك محابيس يا بلدنا
وهدومك
زنازين
وغيطانك الوسايع
ضاقت ع الفلاحين
والدخان في المداخن
لون هم الشغالين
...
يا بنات النيل يا سبايا
ف حبال الجلادين
مابقاش في زمانكم عنتر
لكن فيه الملايين
فارس محسوب الخطوه
يتحرك بالقوانين
لحظة ما تحين الساعه
يركب ضهر التنين
ويحطم الحواجز
ويفك المساجين

--------------------------------------------------------------------------------
حارتنا
_ حارتنا
_ مجاري وناموس
_ مرايه وفانوس
_ حجاره وكراسي
_ شباب ع النواصي
_ دقون ع الكروش
_ عرق ع القروش
_ شقوق في البيوت
_ بيوت في الشقوق
_ مساء تموت
_ صباحا تفوق
_ قديمه وغبيه
_ لبيبه وصبيه
_ في ضيق خرم ابره
_ في غوط المحيط
_ على الذل صابره
_ دا صبر الغويط
_ أسانس البلاده
_ معسكر ولاده
_ خسيسه وجبانه
_ جريحه ومهانه
_ ما تسمعش ندهه
_ رنين الدفوف
_ بتاكل ولادها
_ حتولد الوف
_ مادمنا ضعنا فيها
_ ضروري نلاقيها
...
حارتنا في الحواري
على علم الصواري
لو قال فوقها
الكناري
تتهز المشربيه
ياحوش ادم
يادارنا
يا ساكن حضن جارنا
سيدنا الحسين تبارك
شهيد الانسانيه
مدد سيدنا وشهيدنا
ياقايل ومواعدنا
يكون عيدك
وعيدنا
يوم طلعة شمس جايه
...ياحاره جوا حاره
يا مجمع السهاري
من كل حي
حاره
في الحضره الادميه
مدد انس الحبايب
مدد حاضر وغايب
مدد زين الصحايب
ياساده يا موجيه
...
فيك العيدان هزيله
شايله الحمول تقيله
ولا باليد حيله
ولا الايام هنيه
سيدنا الدردير يا بابا
مدد يابو الغلابه
فوق الحواري غابه
بتمص الادميه
...
صبحك صبايا صاحيه
هاللين من كل ناحيه
مدد ياسيدي يحيى
توعدنا باللي هي
ياحارتنا
يام شيله
هزي الهلال
وهيلا
قدامك يوم وليله
ع الفرحه
والعيديه

--------------------------------------------------------------------------------
هما مين واحنا مين
هما الأمرا والسلاطين
هما المال والحكم معاهم
واحنا الفقرا المحكومين
حزر فزر شغل مخك
شوف مين فينا بيحكم مين
احنا مين وهما مين
احنا الفعلا البنايين
احنا السنة واحنا الفرض
احنا الناس
بالطول والعرض
من عافيتنا تقوم الارض
وعرقتنا يخضر بساتين
حزر فزر شغل مخك
شوف مين فينا
بيخدم مين
هما مين واحنا مين
هما الامرا والسلاطين
هما الفيلا والعربيه
والنساوين المتنقيه
حيوانات استهلاكيه
شغلتهم حشو المصارين
حزر فزر شغل مخك
شوف مينا فين بياكل مين
احنا مين وهما مين
احنا قرنفل على ياسمين
احنا الحرب حطبها ونارها
واحنا الجيش اللي يحررها
واحنا الشهدا ف كل مدراها
منتصرين او منكسرين
حزر فزر شغل مخك
شوف مين فينا بيقتل مين
هما مين واحنا مين
هما الامرا والسلاطين
هما مناظر بالمزيكه
والزفة وشغل البولوتيكا
ودماغهم طبعا استيكه
بس البركه في النياشين
حزر فزر شغل مخك
شوف مين فينا
بيخدع مين
هما مين واحنا مين
هما الامرا والسلاطين
هما بيلبسوا اخر موضه
واحنا بنسكن سبعة ف اوضه
هما بياكلوا حمام وفراخ
واحنا الفول
دوخنا وداخ
هما بيمشوا بطيارات
واحنا نموت
بالاوتوبيسات
هما حياتهم بمبي جميله
هما فصيله واحنا فصيله
حادي يا بادي يا عبد الهادي
ياللي عليك قصد الغنوا دي
لما الشعب يقوم وينادي
يا احنا ياهما في الدنيا دي
حزر فزر شغل مخك
شوف مين فينا
حيغلب مين

--------------------------------------------------------------------------------
نيكسون
شرفت يانيكسون بابا يابتاع الوو ترجت
عملولك قيمة وسيما سلاطين الفول والزيت
فرشولك أوسع سكة من راس التين على مكة
وهناك تنفذ على عكا ويقولوا عليك حجيت
"ؤاهو مولد ساير داير شيلاه يا صحاب الييت"
جواسيسك يوم تشريفك عملولك دقة وزار
تتقصع فيه العايق? والساكت والمنشار
والشيخ شمهورش راكب ع الشعب وهات يامواكب
وبواقي الزفة عناكب ساحبين من تحت الحيط
" واهو مولد ساير داير شيلاه يا صحاب البيت"
خد مني كلام يبقى لك ولو انك مش ح تعيش
لاح اقول اهلا ولا سهلا ولاتيجي ولا ماتجيش
بيقولوا اللحم المصري مطرح مابيسري بيهري
وده من تأثيرالكشري والفول والسوسي ابو زيت
" واهو مولد ساير داير شيلاه يا صحاب البيت"

--------------------------------------------------------------------------------
موال السمك
يابحر قول للسمك
طول ما الشبك فوقك
لا العشق كارك
ولا رمل الشطوط شوقك
انزل قرار النجا
واغطس ولاتقبش
موج العلالي خطر
في النوه
ومغبش
داري على شمعتك
وتحب .. ماتحبش
الصبح نور ياسمك
واعشق على ذوقك

--------------------------------------------------------------------------------
في المعتقل
في المعتقل ياسلام سلم موت واتألم
لكن لمين راح تتظلم والكل كلاب
كلاب حراسه وكلاب صيد واقفين بالقيد
يكتفوا عنتر وابو زيد ويهينوا دياب
الكلب فيهم لايميز ولايتميز
عن الغورريلا ومطيز وبظفر وناب
ومدربينه يدق الكعب فوق راس الشعب
يزرع في قلبه الخوف والرعب من غير اسباب
غير ان شلة حراميه وشمحطيه
عايشين في مصر عواطلية وبياكلوا كباب
عايزين يعيشوا عرض وطول على كده على طول
وان حد بلضم سيدنا يقول جربه ياكلاب
ع المعتقل يرموه في الضيق مايلاقي صديق
وادارة شغلتها التفليق تكتب له جواب
غير الصحافة ماتهول بقى وتأول
وبعد ما الكدب يطول تطلع في كتاب
لكن يامصر حيجي اليوم ويطير النوم
وكل ظالم أو مظلوم حيكون له حساب
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 5:51 am
حاحا
اغنيه بقره حاحا النطاحه
الكلمات
ناح النواح والنواحه
على بقرة حاحا النطاحه
والبقره حلوب
تحلب قنطار
لكن مسلوب
من أهل الدار
والدار بصحاب
وحداشر باب
غير السراديب
وجحورالديب
وبيبان الدار
وف يوم معلوم
عملوها الروم
زقوا الترباس
هربوا الحراس
دخلوا الخواجات
شفطوا اللبنات
والبقره تنادي
وتقول ياولادي
وولاد الشوم
رايحين في النوم
البقره انقهرت
في القهر انصهرت
وقعت في البير
سألوا النواطير
طب وقعت ليه
وقعت من الخوف
والخوف ييجي من ايه
من عدم الشوف
وقعت من الجوع ومن الراحه
البقره السمرا النطاحه
ناحت مواويل النواحه
على حاحا
وعلى بقرة حاحا

--------------------------------------------------------------------------------
حبيبي يامجرم ياسافل
يادون
يارب السوابق
يارد السجون
رزالتك معاهم
ونمك عليهم
دا زائد جنانك
ونعم الجنون
جابولي وجابولك
وياما يجيبوا لنا
لأن البلد دي
حاكمها القانون
توقع مابيني وما بين
الحكومة؟
دي برضك حكومة
وانا ايش اكون
أديك رحت مورته
وحتروح بشرطه
وحيفسحوك
في جميع السجون
وانا مش ح ازورك
كما كنت فاهم
ولاكنت فاهم
ولايحزنون

--------------------------------------------------------------------------------

الاغنيه
الحمام الامري
الحمام الامري صبح ع البناني
قابل الصبح النور بالاغاني
والمعاني الحلوه رنت
في الخميله الصاحيه غنت
والقلوب القاسيه حنت
للأماني
كنت فين يافجر غايب كنت فين
والسؤال ف عنيه دايب دمعتين
والساعات في الليل طويله
ع السهاري في الخميله
والاغاني كل ليله
ولسه تاني

--------------------------------------------------------------------------------

بيرم
ياعيون الشعر الصافي
يابحور هايجين مايجين
ماشيين في طريقك دايما
وح نفضل كده ماشيين
ع الدرب اللي انت سلكته
بالليل والناس نايمين
وان كنا نقول ونزود
ونجود في المضامين
بيكون الفضل لبيرم
أسس واحنا الطالعين
وح نرجع تاني نغني
ونقول ويا الملايين
يا بهيه وخبرينا .. ع اللي جتل ياسين

--------------------------------------------------------------------------------
ابوك السقا مات
الأغنيه
شيلني واشيلك
دانا برضه فرحت لك
وانا بتاعك يا بيه
واعرف
مااعرفش ليه
وكام عبد المعين
لابد في المسؤلين
وانا بتاع كل حاجه
ودراعك اليمين
وهتيف الوزير
وسواق المدير
ومهماز المدام
ونبوت الغفير
وراش العياده
وخدام السياده
واللي من غير سناده
يتعكز ع السرير ؟
وناس بدم ساقع
واقفين
ورا البراقع
يميعوا المبادىء
ويفسروا الشرائع
وناس من خلف شيش
خايفين من الشاويش
سلبيه الميه ميه
تعالي
لأ ما اجيش
دا كان كلام زمان
ما يبقالوش مكان
في مجتمع نضال
بيعجن الرجال
بالصهد والعرق
ولو حس الألم
يوشوش القلم
يصرخ ع الورق
يقول كل الكلام
عريان
مايزقوش
ويوصف الالام
للي ما اتالموش
أصل احنا شعب طيب
والطيبه فينا
بلوى
تاخدنا من قريب
وتجيبنا
كلمة حلوة
سامعين يا اهل البلد
ولا امسك النفير
يالبنت يا الولد
يا المجدع الكبير
عارفين ماشيين منين؟
والسكه السالكه فين؟
....
مشوارنا
مش هوين
وماهواش بالقليل مهما الخيال يزين
لسه الطريق
طويل
و ع الطريق شكوك
وجبال حسك
وشوك
صحصح ياعين ابوك
وامسك
في ايج اخوك
عايزين همة رجال
ابعد من المحال
واسرع من الامل تزلزل الجبال
وتفتح المجال
للعدل والعمل
ويطلع خير بلدنا
على ذمة ولادنا
وتبقى عيشه جنه
وملو الصحن حنه
على كفوف الصبايا
واعيش عين الاعادي
قايمين للعز رايه
واقعد ويا الصحابه
ونقول على الربابه
ياجل الانجازات
ابو السقا .. مات
من شرب الميه
طين

--------------------------------------------------------------------------------
اسكندريه
يا اسكندريه
بحرك عجايب
ياريت ينوبني م الحب نايب
تحدفني موجه
على صدر موجه
والبحرهوجه
والصيد مطايب
أغسل هدومي
وأنشر همومي
على شمسه طالعه
وأنا فيها دايب
كأني فلاح في جيش عرابي
مات ع الطوابي
وراح في بحرك
كأني نسمه فوق الروابي
م البحر جايه
تغرق في سحرك
كأني كلمه من عقل بيرم
كأني غنوه من قلب سيد
كأني جوا المظاهره طالب
هتف باسمك
ومات معيد
كأني صوت النديم
في ليلك
بيصحي ناسك
يشدوا حيلك
كأني طوبه من بيت في حاره
كأني دمعه
في عيون سهارى
كأني نجمه فوق الفناره
تهدي الحيارى
والبدر غايب
يا اسكندريه
يامصراويه
على سن باسم
على ضحكه هاله
البحر
شباك ومشربيه
وانتي الاميره
ع الدنيا طاله
يا اسكندريه عاشق
وبدوي
ارتاح في حضنك
والود ودي
يكون كلامي
عربون غرامي
وبالمحبه
ناخد وندي
يا اسكندريه فيكي الغلابه
ع الرزق يسعوا ولايناموش
صبح صباحهم
رجع مساهم
وزاد شقاهم
ومارتاحوش
يا عيني ع اللي الزمان تعبهم
وضاع تعبهم
ومالتقوش
نزل شبكهم
في بحر طامي
طلع شبكهم
على فاشوش
وفيكي بين البشر
ديابه
وفيكي فوق البشر
وحوش
وفيكي ناس مغرمين صبابه
لو خان زمانهم
مابيخونوش
وفيكي خمري
سلمت امري
ما اقدرش اشوفه
وما انيلوش
سمك يا بني يا اسكندراني
في العشق واحد
مالكش تاني
سمك يابني يا اسكندراني
في الحسن ساحر ومعجباني
سمك يابني
والعشـق غيه
تبدأ بنظره
تبقى ملاغيه
وكل عاشق وله بهيه
وكل شاعر وله اغاني
وأنا اللي عشق الصبايا كاري
أعشق وأغني ما اقدرش اداري
واي نظره بتجيب قراري
وايشحال عيونك
يا الاسمراني

--------------------------------------------------------------------------------

بوتيكات
الأغنيه

بوتيكات النات كوا النات
وشقق مفروشه وعمولات
ياحلاوه الناوه كوا الناوه
يابلدنا يا اخر فتاكات
بوتيكات النات كوا النات
شبيك لبيك فتح مخك
لبيك شبيك غمض عينك
حتقفل مخك ح نطخك
ونلوشك لو تفتح عينك
ركب قرنين تركب مازاد
وتعيش سلطان في البرواز دا
مش عاجبك فالجبنه الفازده
والفول والعيش والكراث
ياحلاوه الناوه كوا الناوه
يا بلدنا يا اخر فتاكات
بوتيكات النات كوا النات
مين فيكوا مايعرفش عليوه
شيال المينا الكحيان
في ثواني اتمول واتحول
بقي مسيو عليوه عليان
ازاي؟
ماهي بوظه ومفتوحه
على حس ولاد المفضوحه
وأرانب صاحيه ومدبوحه
تتأسك تبع البنوكات
يا حلاوه الناوه كوا الناوه
يابلدنا يا اخر فتكات
بوتيكات النات كوا النات
حتقول الفقرا ومشاكلهم
دي مسائل عايزه التفانين
وأنا رأيي نحلها رباني
ونموت كل الجعانين
وبهذا ماحدش
ح يجوع
لو نعلن هذا المشروع
وح نقفل هذا الموضوع
نهائيا
ونعيش في تبات
ياحلاوه الناوه كوا والناوه
يا بلدنا ياخر فتكات
بوتيكات النات كوا النات

--------------------------------------------------------------------------------
على رأي المثل
ان قلت كلمه لم تخاف
وان خفت كلمه
لم تقول
كلام تقيل
على الخفاف
والفهم لصحاب العقول
مافهمتنيش
شد اللحاف
ونام وسيب النوم يطول
وبوس وسيب النوم يطول
وبوس اديك
وكلها حاف
والصبر برسيم العجول
تاكل شمال
تشيل كتاف
يعرض قفاك
واصبر
تنول
ولما تفرج
بالكفاف
تهيص
وتملا المخله
فول
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 5:59 am

فاليري جيسكار ديستان
الأغنيه
والست بتاعه كمان
حيجيب الديب من ديله
ويشبع كل جعان
يا سلاملم يا جدعان
ع الناس الجنتلمان
داحنا حنتمنجه واصل
وحتبقى العيشه جنان
التليفزيون حيلون
والجمعيات تتكون
والعربيات حتمون
بدل البنزين
بارفان
وحتحصل نهضه عظيمه
وحتبقى علينا القيمه
في المرسح او في السينما
او ف جنينة الحيوان
وحتبقى الاشيا زلابيه
ولاحوجه لسوريا وليبيا
وحنعمل وحده أرابيا
مع لندن والفاتيكان
والفقرا حياكلوا بطاطا
وحيمشوا بكل ألاطه
وبدال مايسموا شلاطه
حيسموا عيالهم
جان
ودا بفضل صديكي
ديستان الرومانتيكي
ولا حدش فيكو شريكي
في المسكن
والسكان

--------------------------------------------------------------------------------
اهيم شوقا
زمان لما افترقنا ليل الطريق سرقنا وتهنا في المسالك
انا المجروح وانتي حزينه زي ماانتي عنيده في امتثالك
تعبنا ياحبيبتي تعبنا م العناد طريق واعر فرقنا وتهنا في البلاد
مع انك ياحبيبتي حياتك في الوداد وانا عارف نهايتي في البعاد
عذابك وحشني وعشقك هبشني وقلبك فرشني جناين وقمره
راجع لك ياسمرا
اهيم شوقا اعود شوقا الى لماكي وسلسبيلي
ياسمرا ياللي الهوى رماني
وتهت فيكي وضاع زماني
يحدفني بحرك لبر تاني
يجيبني شوقي او تندهيلي
اهيم شوقا اعود شوقا الى لماكي وسلسبيلي
هربت منك لقيتني فيكي
بعدت عنك قربت ليكي
سهرت وحدي اتونست بيكي
غلب حماري وتاه سبيلي
اهيم شوقا اعود شوقا الى لماكي وسلسبيلي
----------------------------------------------------------------------------------------------
غنوة للشباب غزة فى قلب العرب الكلمات المتقاطعة قال الراوي اليويو القواد الفصيح ميكي يا مرحرح يا عرب المرجيحه الشيخ عاشور ورقه .. من ملف القضية حسبة برما التضليل محلا القصايد منشور وطني دعوة يا مصر دللي الشيكاره الجدع جدع انا رحت القلعة على الربابة ساعة العصاري الشركسي هلا بالحب النداله إصحى يا مصر أول كلام شجرة لو دعاء الكروان تاجر أخر الكلام يا فلسطينية بلح ابريم الخط دا خطي مٌر الكلام النيل عطشان
غنوة للشباب
هلى يا شمس البشاير
طابت وآن الأوان
طلي وحلي الستاير
نور الأشاير يبان
وارخي الضفاير مناير
فوق الزمان والمكان
مصر الشباب العزيزة
قامت وكان اللي كان
مصر اللي خاضت ليالي
بحر الضلام الرهيب
تسهر عليها المبالي
تزعق
ولا من طبيب
عرف بلاها ودواها
بعيون شبابها النجيب
تسلم عيون الأطبا
ويعيش حكيم الزمان
قال الشباب المداوي
شقشق يا نور الصباح
تظهر أصول البلاوي
تطهر عيون الجراح
يخضر عود الأغاني
يسري العبير
فى البراح
تسرح فى مصر الأماني
زي النشيد والأدان
مصر العلوم والصنايع
والفلاحين
والغيطان
مصر الجنود بالمدافع
متسلحين للميدان
مصر السلام
بالمعارك
يفرش يغطي المكان
ينده يا شمس الحقيقه
طلي .. عليكي الأمان
غزة فى قلب العرب
ناح الحمام في الدوح
دمع البنفسج
سال
والورد
مال مجروح
من شكة الموال
قال الحمام .. ياليل
ويا عيني
ع اللي إنقال
مين يشتري الفيروز؟
غزه .. مع الدلال!
من فين يا شابه النسب
وبنت مين في الناس ؟
ومين في ناسك حسب
وعطاكي.. للنخاس!
بحرين عيونك أسى
ساقيين .. قلوب الناس
من فين يا شابه النسب
وبنت مين
في الناس !؟
قالت _ بلهجة عرب _
غزه .. في قلب العرب
حره .. وأهلي عرب
خالص
وبنت حلال
_ ألا أونا بنت العرب
للبيع
ومين قال كام ؟
سنيوره شبه القمر
مصنوعه .. للأحلام
يا حلال
على المقتدر
وع الغلابة حرام
دق الجرس بالعدد
واحد
ومين قال كام ؟
البنت من بدعها
ضحكت
ومن قلبها
عشقت
ومن وجدها
سمع الوجود زلزال
_ لايا عديم التنا
لاانت
ولا البايعين
سوق النخاسة جبر
والأهل بالملايين
أبويا باني الحرم
وامي من القدسين
ومصر
فيها الهوى
والعزوه
في الشرقين
حلفت بالمرحمه
والدم
والملحمة
والفارس اللي حمى
ما امشي
ورا الأندال
ما امشي
ورا الأندال
الكلمات المتقاطعة
بدل الكوره
ولعب الفوره
وسط الغاغه
والبرجاس
تاكل زغده
تاكلك دبشه
تملا دماغك
بالقلقاس
ياللا نفكر
حتة لعبه
زي السكر
بالأناناس
كلمه ومعنى
رأسي وأفقي
يحكوا حكاية
تهم الناس
قرب قرب
ياللا نجرب
شغل مخك
ولا تحتاس
_ واحد رأسي؟
رأسي بتضرب
تقلب
تشغي بالأفكار
مسرح
والأفكار هوامه
في الدوامه
ليل .. ونهار
أبيض إسود
أخضر ..أحمر
بارد .. حامي
جنه ..ونار
سيبك سيبك
من تغريبك
بكره الليل
يطلع له نهار
_ اتنين رأسي ؟
حاكم حالي
كان طرطور
خان الدار
والجار
والنور
_كل ما فينا من حكام
نازلين
من خنفس .. وكافور
كذبوا _ أفكوا
قتلوا _ سفكوا
غدروا _ خانوا
فضحوا _ هتكوا
_ واحد أفقي ؟
شاعر داعر
ميت .. حي
طالع .. نازل
رايح .. جي
مادح سيده
مادد إيده
لايشوف حاجه
ولا يقول شي
_ كل ما فينا من شعارير
خونه
وهتيفة .. وخنازير
تجروا _ باعوا
لمعوا _ ذاعوا
أفلوا _ غربوا
تاهوا _ ضاعوا
_ اتنين أفقي ؟
شعرا تلاته بكلمه باروده
ناظم
بيرم
بابلو نيرودا (1)
_ كل ما فينا من عشاق
داقوا ما بينا
من أشواق
حبوا _ عشقوا
شبوا _ نشأوا
مروا _ فاتوا
غرسوا _ رشقوا
_ رأسي وأفقي ؟
شاعر واعر
لازم جي
يملا عيون العالم ضي
كل ما فينا من أحزان
تستنظر عاشق فنان
يأتي _ يقبل
طائر _ بلبل
حرفي _ فني
يشدو _ يغني
وطني سكني
أهلي .. قومي
منكم فيكم
صحوي نومي
أنتم فكري
أنتم عملي
منكم توقي
فيكم أملي
هيوا _ لبوا
ثوروا _ هبوا
يشرق _ يسطع
صبح _ مطلع
يزرع _ يبني
نحصد _ نجني
نمرح _ نلعب
نشدوا _ نغني
واحد رأسي
نشدوا نغني
اتنين أفقي
نشدوا نغني
تالت خامس
عاشر ميه
نشدوا نغني
نشدوا نغني
نملا العالم
خضرة عفيه
نشدوا نغني
نشدوا نغني
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 6:08 am

الراوي _ قال الراوي
يا سادة يا كرام
صلوا على خير الأنام
الحلم في العلم
بكره اللي جاي
أخضر
والشعر في الحلم
فارس بيتمخطر
راكب حصان السبق
شاهر
حسام قاطع
رايح يجيب النبأ
زي النهار
ساطع
ويطلع الفجر
فوق السحاب لاغبر
يا سامع الشعر
فكر
تشوف أكتر
وحدوه
حكايتنا
كانت من قديم القدم
ولسه كاينه
وياما لسه تكون
طول ما العمار مسكون
بالغفلانين ياما
طول ما الغضب مكنون
جوه الصدور
ياما
طول ما القليل حاكمين
والمحكومين ياما
طول ما احنا متخانقين
والشمتانين .. ياما
طول مااحنا نبقي كده
والظلم
فوق كل دا
ممكن تعود الحكاية
من أول المشوار
وتلف بينا الرحايا
دوار
ما بعده دوار
ويخش ديب الصبايا
في عباية السمسار
ياكل فراخنا العتاقي
ويدبح
اللي صغار
الحلم
يتأخر
والشعر
يتبخر
ويغرق الشمس
بحر الضباب الاصفر
يا صاحب العقل
فكر
تشوف أكتر
اليويو
يا واد يا يويو
يا مبرراتي
يا جبنه حادقة على فول حراتي
أستك لسانك
فارد ولامم
حسب الابيج
يا مهلباتي
يا واد يا يويو يا مهلبية
فوق الصواني
سايحه وطريه
فى كل جلسه تلبس قضيه
وتخيل عليها
يا مشخصاتي
حسب الوظيفة
وأنت وشطارتك
تظهر حلاوتك
تظهر مرارتك
لو خفضوك ترفع حرارتك
لو صعدوك
تقلب جيلاني
وبالمناسبة
وأنت اللى أدرى
كان لك تحفظ على المبادرة
ليه النهاردة بترش بودره
يا بن الأبالسه
يا ملطفاتي
وفى النهاية
لك عندى كلمة
آخر طريقك زحل وضلمه
حيث ان آخر القرع ضلمه
يا إما كفته
عند العجاتى
القواد الفصيح
سلمي يا عزيزة على الأستاذ
فنان اليوم
والمستقبل
محمود محمود محمود الباز
بنتي السنيورة القمورة
على فكره
بترقص ممتاز
ارقصي يا عزيزة متنكسفيش
محمود بقي منا خلاص ولا فيش
يا عزيزه النيزه كوا نيزه
كان ممكن
تطلعي مركيزة
تكي تم تكي تم تكي تم
تم تم
الرقص النقص يزيح الهم
تكي تم تكي تم تكي تم
تم تم
ويمشّى الحال
ويجري الدم
تكي تم تكي تم تكي تم
تم تم
على فكره يا كابتن محمود
وبرغم الكبت الموجود
أنا راجل ثوري متحرر
وعزيزه بتلعب على العود
إلعبي يا عزيزه متنكسفيش
ويخلي القعده شهيه
يا عم
ترالم ترالم ترالم
لم لم
أنا رأيي يا سيد محمود
وبرغم الصمت المقصود
إنك فنان المستقبل
ونشيد العصر المنشود
قربي يا عزيزة من الأستاذ
محمود ما بقاش محمود الباز
محمود بقي منا خلاص
ولا فيش
يا عزيزه النيزه كوا النيزه
كان لازم تطلعى مركيزه
ترالم ترالم ترالم
لم لم
العود النود
بيزيح الهم
ترالم ترالم ترالم
لم لم
محمود بقي منا خلاص ولا فيش
قربى يا عزيزة ما تتاخريش
يا عزيزة النيزه كوا النيزه
أنا رأيي إنك مركيزه
هلالم هلالم هلالم لم لم لم
محمود النود بقي نازل هم
هلالم
هلالم
هلالم لم لم
وعزيزه النيزه
تحب الهم
هلالم
هلام
هلالم لم لم
ميكي
بصراحه يا أستاذ ميكي
إنك رجعي وتشكيكي
قاعد لا مؤاخذه تهلفط
وكلامك رومانتيكي
ولا ناوي تبطل تكتب
بصراحه كلام بولوتيكي
عن دور الحل السلمي
وإستعماله التكتيكي
فى الوقت إللى إحنا صراحه
دايخين دوخه البلجيكي
وبلدنا لسه جريحه
وبتصرخ بالآفريكي
لو بات التار يا ولادي
ح يبات الذل شريكي
والشعب يقول يا بلادي
بالروح والدم أفديكي
وحاجات بصراحه بتحصل
فى بلدنا يا أونكل ميكي
بصراحه ولا أنت معايا
ولا طالل من شبابيكي
وكأنك مثلا موميا
للسلطان الانتيكي
أحياها لا ستعمالها
لاستعمار الامريكى
رجعت على هيئة
ميكي
يا مرحرح
يا مرحرح خالص مالص
يا رقيق جدا وسمين
يا غصين إلبان يالا للي
يا خواتي
على الطعمين
يا حلولا
يا ورده يا فله
يا معشش فى البساتين
يا بو شعر مسبسب سايح
من صهد البريانتين
يا منور فى التشريفه
ومضلم فى التخمين
يا بو كرش مدور
كور
من لحم البني آدمين
يا صباح الخير يا لفندي
يا نهارك
رحرح خالص مالص
ولا سائل فى التانيين
مرعوب كده ليه يا حلاوه
ومفاصلك ليه سايبين
وتموت فى الدبلوماسيه
وتخاف م الفدائين
وتشوف الحل السلمي
فى الراديو وفى الجرانين
تتنهد من معاميعك
وتقول قادر يا معين
ما تصح النوم وتفوق
وتشوف بتكلم مين
الشعب بخير يا مرحرح
والناس كلك عارفين
مين إللى خان يا بهيه
ومين قتل ياسين
ومين بهدل بلدنا
ومين ومين ومين
ويا مصر يا أول صوره
فى عيون المولودين
ويا مصر يا آخر صورة
فى عيون الميتيين
يا بلدنا
يا بكره ولادنا
يام الدنيا والدين
يام الولدات المجدع
والبنتات الطعمين
يحرم إسمك علينا
ونعيش متغربين
لو سبنا الذل يدوسك
أو عشنا مغلوبين
ويا سينا
أكيد جايينك
ناخذ بتار ياسين
يا عرب
يا عرب
يا عرب
يا عرب في أي مصر
يا عرب
يا عرب
إسمعوا صوت شعب مصر
احفظوا لمصر المكان
وإحنا ع العهد إللي كان
مصر أوفي م الزمان
وانتوا عرفين شعب مصر
يا عرب
يا عرب
ياعرب يا أهل مصر
إللي خانوا العهد بينا
واستباحوا كل حاجه
واستهانوا بالعروبه
واستكانوا للخواجه
مستحيل حيكونوا منا
إحنا حاجه وهما حاجه
هما باعوا البندقيه
والوطن والجلابيه
وإحنا أصحاب القضيه
إحنا ما بنبعش مصر
يا عرب
ياعرب
يا عرب يا أهل مصر
يطلع الدجال بزيفه
يملا بحر النيل ضباب
ينزل الجلاد بسيفه
يزرع الموت والحزاب
يطول الليل زي كيفه
الصباح له ألف باب
وإحنا بوصلتنا ف ادينا
ما تخافوش م الليل علينا
مهما غبتوا عن عنينا
انتوا جوه في قلب مصر
يا عرب
يا عرب
يا عرب يا أهل مصر
سينا ولا
يافا ولا
حيفا ولا
دير يا سين
إسألوا الشمس إللي هاله
ع إللي صحيوا مبدرين
يزرعوها
نور وغله
دول جدودنا
ولا مين ؟
حقنا وحتما يعاد
بس لو بانت سعاد
والبيان ده
له معاد
والمعاد
حيكون ف مصر
المعاد
حيكون ف مصر
المرجيحه
يا عم ادريس
ياعم ادريس
يا بو المرجيحه والقواديس
ما جاش الدور ؟
عشان يطلع قادوسي لفوق
أبوس النور وأطفي لعلالي شوقي
وأغنى فى الهوي موال
على ورد الخدود والخال
وادوق الحب سحر حلال
وأشوف الدنيا
وأبقي عريس
ياعم ادريس
ياعم ادريس
ياعم ادريس على الدور
أدور وأطلع مع الطالعين
كفايه سنين ياعم ادريس
ياعم ادريس
كفايه سنين
وأنا وعيال
كما العصافير
رفاقه كلنا وفرافير
يا دوب يعلا الجناح بينا
يعدينا القادوس ويطير
ونرجع تاني لأفراحنا
ولا عرفنا الطريق من فين
وجينا
زي ما رحنا
حياري ومحرومين لاتنين
نداوي بالغنا جراحنا
ونرمي اللوم على الجناحين
وجرح النفس له وجعين
يبكي القلب
قبل العين
وقاضى الحظ له شرعين
لاهل البخت ... والمتاعيس
ياعم ادريس
ياعم ادريس
وآه لو بختنا يشوفنا
ونرمي الزهر يدينا
وقاضي الحظ ينصفنا
ويحكم بالامل لينا
ونتمرجح على كيفنا
وينساب القادوس
بينا
يا خدنا بعيد ويحدفنا
وعند الشمس يرمينا
على بحر النسيم نسبح
وتسرح فيه أمانينا
وفوق شط النجوم ننزل
وترسي هناك مراسينا
ويبقي الجو هليله
تلعلع فيه
غناوينا
ونبدر
فى الفضا حبه
غناوي
كلها محبه
تقول للهم يتخبي
وترقص فى الهوي الفوانيس
ياعم ادريس ياعم ادريس
الشيخ عاشور
سلام مربع يا بلد
للشيخ عاشور
قلب الاسد
سلام يا واد
على دا ودا
لو دسته منه
فى البلد
ما كانش كان
كل اللي كان
ولا كان دا حالك يا بلد
مدد يا شيخ عاشور
مدد
مدد يا شيخ عاشور مدد
ورقه .. من ملف القضية
= إنت شيوعي
- أنا مصراوي
=إنتو مصايب إنتو بلاوي
- ممكن أعرف مين الأول بيكلمني
= إحنا نيابة أمن الدولة
- دول مين
= دولة مصر
- مصر العشه ولا القصر
= أيوه حنبدي ندور ونلف حاجه تنرفز خالص
إف
- مالك ... شايل طاجن خالك
= لم لسانك ما تخرفش
- أنا ما اقصدش اهانتك طبعا
=أيوه استعبط
- لاما اعرفش
= إيه رأيك في سفارة كوريا
- إيه رأيك في قضية مصر
= مصر ف وحده
هى وسوريا وليبيا ولازم ييجي النصر
- ييجي منين وازاى ولمين
= آدى كلام الشيوعيين
- أنا من حقي
=حق ف عينك
- أنا بتكلم بيني وبينك
= يعني كلام بره التحقيق
- إذا كانش يسبب لك ضيق
= طيب قول
- مين مسئول ؟
= مين مسئول عن إيه يا إخينا
- ع إللي جرى لنا ف غزه وسينا
= أنت شيوعي أكيد وطاوعني
فض دمغك من دي قضيه شعبنا جاهل
مهما تقول له
مش حيآمن بالشيوعية
- ما الشيوعية فى فيتنام
إيه رأيك فيهم يا همام
= مش بطال مش بطال
لكن إحنا .. ورانا عيال
- طب ما نحارب لجل عيالنا
يطلعوا أسعد من أجيالنا
= إنت الظاهر مخك فاضي
وحتتعبني معاك ع الفاضي
وأنا بحبحت معاك بكفايه
إبقي اتفلسف عند القاضي
- هى قضيه ؟
= لأ ملوخية
أمال فاهم إيه آمال هى الدولة دى لعب عيال
- ممكن أعرف أنا هنا ليه
= أيوة حتعرف
أمال إيه
يوم خمسه وعشرين الماضي
إيه مشاك عند التحرير
- تحرير إيه يا جناب القاضي
= أنا مش فاضي
- بكره تصير
= بطل غلبه وجاوب دوغري
- أنا غلباوي كده من صغري
= كل الشيوعيين أمثالك
آخر غلبه وقله ذوق يحصل إيه لو تمشي ف حالك
فاكر نفسك مين
ما تفوق
- لو راح افوق
مش من مصلحتك
= أنا معجب جدا بصراحتك
إيه رأيك فى حكايه الطلبه
- حاجه عظيمه بشرة خير
= إنت دماغك ينفع جزمه
- وانت لسانك ينفع سير
= إخرس قطع لسانك سافل
- كتر خيرك
= مخك قافل
مين وداك بقي عند الطلبه رايح ضمن المندسين
- رحت أناقشهم واسمع منهم
= تسمع منهم إيه يا سي طين
دول عايزين الدنيا تولع علشان أصلا
مش فاهمين
هى الحرب يا عالم لعبه
دى بتتكلف بالملايين
= وأنت حتدفع إيه من جيبك
- امال ح ادفع من جيب مين
إنت حمار وخدوك فى مشمك رحت هناك زى الباقيين
عاملين لجنه
وقال وطنيه
مش ممكن دول وطنيين
وجماعة أنصار الثورة
وفلسطين وهباب الطين
ما نخلينا يا سيدي في حالنا
مالنا ومال الفدائين
هو إحنا اللي نهبنا بلدهم
دول عالم صيع فاقدين
قتلوا الراجل عند الشيراتون
وإحنا إللي طلعنا القاتلين
- وصفي التل دا كلب وخاين
= اهو كل العالم خاينين
واحد صاحبي مراته مرافقه
وهو مرافق
ييجي عشرين
أمريكا بتزعل وبتحرن
هو إحنا يا عالم ناقصين
مش نستعبر
م إللي جرالنا
ونعيش بقي زى العايشين
دي عيال عملا للشيوعيه
وإحنا عدو الشيوعيين
- ورق دمك بس يا بيه
مين مساعدكو بقالكو سنين
= بيساعدونا صحيح يا سي بعجر
علشان أصلا مش فاهمين
إحنا حيلتنا منين نديهم
ونسددهم بالملايين
= يمكن يعني قضيه مبدا
- مبدا مين وزكايب مين
هي دى عالم تعرف مبدا
دولا باقول لك
ناس مجانين
اخترعولنا السد العالي
علشان نبقي اشتراكيين
إشتراكيه هناك ف بلدهم
وإحنا ف دارنا
نعيش حرين
عايزين الفلاح الجاهل
يتساوى بالمحترامين
وكمان قال
تحديد ملكيه
أبو ألفين
يدوه خمسين
شغل ملاحده وعالم كفره
ومخالفين أحكام الدين
والعمال رخرين اسم الله
فاهمين روحهم
بني آدمين
ناس عايزين الحرق بولعه
دا كله من الشيوعيين
نشروا لنا الأفكار السوده
أولاد الكلب الملاعين
مين وداك بقي عند الطلبه
انطق قول
اتكلم مين
- هما إيه مطالبهم ؟
= انت حتستجوبني يا شاطر
- لأمش قصدى
بس أنا باسأل
كانوا طالبين كراريس ومساطر
ولا مطالب ميه الميه
كل الشعب مآمن بيها
=دول طالبين حرب وشعبيه
مين مجنون بقي
حيمشيها
عايزين يدوا الرتش سلاح
عشان تحصل فيها مجازر
أنا لو أشوف حلوف فلاح
شايل شومه
لازم اهاجر
- لازم بينه وبينك دم
= دم ف عينك
هس اتلم
ثم نحارب ليه
وبايه
بسلاح ما يموتش بعوضه
- ورق دمك بس يا بيه
الحرب ضروره ومفروضه
واهو نفس سلاحنا المظلوم
في فيتنام دابح أمريكا
= دى طبيعه أرض يا بني آدم
- بطلوا بقي كدب وبولوتيكا
طب ما الهند بنفس سلاحنا
فى باكستان
بعزقت الغرب
=رأيك يعني ضروري ان إحنا
وحتما يعني نخش الحرب
طيب
حاضر
فين المخبر
حتغير رأيك
بالضرب
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 6:15 am

حسبة برما بمناسبة زيارة ابن الهرمة
كشف الرافضين
ببطارية ماركه - نانسين -
يهوديه عربيه
سته مشاغبين
وستميه سته وستين
واتنين صنايعيه
سبعة مداقرين
وسبعميه سبعه وسبعين
غاويين شيوعيه
ألف وستين
وربعميه
منهم عشرين
وتلاته وطنيه
أما الباقيين
فألف ميه وتمانين
طلاب وشضليه
تسعه وتمانين
من إللي راحوا تشرين
تحت المعديه
يبقي موافقين
حسب انضباط القوانين
والحسبه شرعيه
تسعه وتسعين وتسعميه وتسعه وتسعين
من ألف في الميه
أجري التدوين
بمبني بندر قافشين
وبلجنه مدنيه
طرطور الدين
رئيس نيابة هابشين
وشكوكو عدويه
وحسين حابسين ضابط مباحث عابدين
والست سريه
لجنة
عشرين
شبرا ومغاغة
وقلين
أسوان دقهلية
التضليل
دا شيعه
واحنا سنه
دا فين ومصر فين !
عايزين يدخلونا
نظام ودنك منين
وناس تقول شيوعي
وعامل نفسه شيعي
عشان خايفين طبيعي
ليبقوا ثورتين
يا أسيادنا اللصوص
قرينا ف النصوص
لو الإنسان يلوص
يغوروا الفرقتين
وشفنا ف الكتاب
ولقينا الدين حساب
وثورة وانتساب
وعين تساوي عين
وسرقتوا الثورة منا
وقلتوا الصبر منّه
وعقب الصبر جنّه
وباب بمفتاحين
ودان المَلُك ليكو
وزاد الفجر بيكو
وعملتوا اسلامين
وكفرتوا الامام
وطفشتوا الحمام
وخلاصة الكلام..
يزيد ولاّ الحسين !??
محلا القصايد
محلا القصايد
في الشدايد
والغنا
محلا الكلام والحب
أوقات الشقا
إحنا إللي تهنا ع الطريق
من بعضنا
متفرقين
والسجن هو الملتقى
آه يا رفاقه
من متاهات الطريق
لما الليالي بيتخنق فيها القمر
يمشي الصديق في الظلمه
يخبط في الصديق
والسكه بنت الخطوتين
تاخذ سنه
إحنا النهارده فين
وكام
وبكره كام
وبعده فين
وبتنا إيه
صحبنا إيه
وكنا فين
بقينا فين
فى كل يوم بنزور مكان
وكل يوم بنزيد عدد
وكل يوم نفتح بيبان
وكل يوم بنزيل سدد
وكل يوم يطلع بُنا
وكل يوم ينزل هدد
وكل يوم نحبل غنا
وكل يوم نولد مدد
جوا السجون
برا السجون
إحنا كده
لازم نكون
محلا القصايد
في الشدايد والغنا
محلا العيدان الخضر
فى الربع الخراب
إحنا إللي تهنا ع الطريق
من بعضنا
متجمعين
بنخط كلمه من كتاب
ملعونه قامه تنحني
بالقهر
من حاكم
وخان
ملعونه كلمه تنتني
فى الحلق
تهرب م اللسان
ملعونه ساعه
تنحسب م العمر يفنيها الخضوع
ملعونه لقمه مغمسه بالذل
ملعون الجبان
آه يا رفاقه
يا للي علمتوا الصلابه
للحجر
بانده لكم وسط الرتابه
والكأبه
والضجر
يا مقربين الفجر نوره
ومطلعه
مدوا المسامع
في المجامع
واسمعوا
صرخه مغني الحي من جوف العدم
اتجمعوا
اتجمعوا
منشور وطني علني رقم 1
أيها المواطنون
أيها المواطنات
مصر من طول السكات
بتناديكم
تسمعون ؟
عطروني بالبارود
كحلوني باللمون
عايز اغمض
أو أفتح
يرجع الشوف للعيون
والقى سينا جوا حضني
والجناين والزتون
يا حبايبي
يا جنودي
ما عساكم تفعلون
يحكي من أمثال زمان
كل وقت وله أذان
يا بهيه وخبرينا
يعني إيه
معني الأدان ؟
لما نصحى فى الصباح
والخلايق مجروحين
تبقي حي على الكفاح
والسلاح يا مظلومين
واما نصحى بالسلام
والخلايق مرتاحين
تبقي حي ع الكلام
والمناقشه يا أفلاطين
أيها المواطنات
مصرنا
ست البنات
عايزه منكو
تزوقوها
وإنتو أهل المكرمات
عايزه عقد النصر وردي
والحلق بالدلايات
عايزه طرحه وعايزه فرحه
وعايزه ساعه م الساعات
تعجنوا الحنه السويسي
من زتون البيارات
ما عساكن فاعلات
أيها المواطنات ؟
يا حياة الشعب يا
مصريا
نور العيون
الحياه والممات
والمشانق والسجون
والكلام والآلام
والدساتر
والقانون
والعساكر
والدساكر
كله فى حبك يهون
ليس فينا من جبان
ليس فينا يحزنون
فينا طيبه
زرع طيبه
بس آه لو تعلمون
لو يفيض الصبر بينا
تطفح النار م الأتون
لو يغطي الصعب سينا
والعبور
يصبح جنون
نرمي يا مصر العزيزه
جسمنا فوق المنون
وإنتي يا مصر الحبيبه
عندنا جوا العيون
وإحنا يا مصر الجميله حبنا
فوق الظنون
دعوة
يا خالقنا وعالم بلاوينا
يا رازقنا
وحاسب خطاوينا
نسأل فضلك
من إحسانك
يظهر عدلك
وبسلطانك
يطلع فلاح من وسطينا
يزعط أفندينا
وحرامينا
يا مصر
فلاحينك هما هما
فلاحين رمسيس وخوفو
جيش
لا عيش ولا زمزميه
فى الهجيره تبل جوفه
المرض للموت يجرة
وهو ماشي
يجر خوفه
أعمي
سالك سكه عتمه
خطوته
على قد شوفه
دللي الشيكاره

دللي الشيكاره
دنب الشيكاره
واجعد يا حفنى
ولع لك سيجاره
فكر شويه
فى العيشه ديه
ايه الجضيه
ايه العباره
من صغر سنى
شجيان لكنى
ما لط سني
غير البصارة
ودخلت حارة
من جوه حارة
وف كل حارة
عليت عمارة
وسط المعاول
بّنا ومناول
بس المجاول
كلنى بشطارة
ولا خلا صرة
ولا لجمه حره
والعيشة مره يا بوي
آخر مراره
الجدع جدع

الجدع جدع
و الجبان جبان
بينا يا جدع
ننزل الميدان
و الميدان بعيد
عن جوف المدينة
يا تار الشهيد
دير ياسين و سينا
بحري و الصعيد
إحنا أهه ادينا
اصلب م الحديد
في الشدة تلاقينا
بالنار و السلاح
نعلن الكفاح
فوق كل العواصف
و هبوب الرياح
يسبق الليالي
و يجيب الصباح
و يهزم الهزيمة
و يداوي الجراح
عاوزين اللي راح
قدامكو الميدان
و الجدع جدع
و الجبان جبان
انا رحت القلعة

انا رحت القلعة و شفت ياسين
حواليه العسكر و الزنازين
و الشوم و البوم
و كلاب الروم
يا خسارة يا أزهار البساتين
عيطي يا بهية على القوانين
انا شفت شباب الجامعة الزين
احمد و بهاء
و الكردي و زين
حارمينهم حتى الشوف بالعين
و ف عز الضهر مغميين
عيطي يا بهية على القوانين
و قابلت سهام
في كلام إنسان
منقوش و مأثر في الجدران
عن مصر و عن عمال حلوان
مظاليم العهد المعتقلين
عيطي يا بهية على القوانين
و قابلت هناك
منذر و زياد
و قابلت كمان عزت و جواد
أربع أبطال
شنقوا الجلاد
"التل" يهوذا الفدائيين
زغرطي يا بلدنا لدول مساجين
و اسمعي يا بلدنا خلاصة القول
و بقولك أهه و أنا قد القول
مش ممكن كده حيحول الحول
على كده و الناس يفضلوا ساكتين
خليكوا فاكرين
خليكوا شاهدين
انا رحت القلعة و شفت ياسين

على الربابة
الاغنيه
أصلي ع النبي قبل البداية
نبي عربي مشفع فى البرايا
واسلم بالوتر والقوس عليكم
ياكل السائرين ع الشوك معايا
يقول الشاعر المجروح فؤاده
من الاندال
ومن دق الرحاية
غرامي بالحروب يسبق كلامي
وآملي فى الشعوب
يخلق غنايا
وعشقي للكلام
غالب سكوتي
وكرهي للسكات
جالب شقايا
يقول ابن العرب
والجرح نازف
صديد الذل
ودموع السبايا
ونار الغل
من أيلول ويونيه
وريق المر من طعم الرزايا
رضانا بالقليل والخوف
رمانا
لحكام المواكب
والهفايا
وبيع الأرض بالعرض لعدوي
على عينك يا تاجر فى المرايه
وايه بعد المسيرة الهاشمية
على درب الخيانة للنهاية
**
يا شعب العرب
يا ابن الفوارس
يا رافع للنضال بيرق وراية
يا واهب للزمن
أيام وضية
بنور البذل
والجود والعطايا
صلاح الدين
ينادي من منامته
على النايمين
على دم الضحايا
لاأنا منكم ولا إنتو من ولادي
إذا رضيتم
بغير النصر غاية
ولا غير السلاح فى الحرب
يحكم ويحسم
فى المشاكل والقضايا
ساعة العصاري

ساعة العصاري يا نسايم
والبحر نايم
وأنا هايم
ماشيه الحليوة وخلخالها
يحكي الحكايه اللي ف بالها
يا أبو البنيه
صبرك شويه
وادي الكحيله لخيالها
البنت قالت أشوف بختي
وكفايه فى الحب مناهده
وأعرف نصيبي
عشان يا ختي
يطمن القلب ويهدا
قال الودع لما حكى لها
على الحكايه اللى ف بالها
يادي الصبيه
صبرك شويه
وإدي الكحيله لخيالها
و الحلوة قالت يا نصيبي
هات العدل
ولا تستعجل
دا العمر مهما يمشي بي
تروق وتحلا وتتعدل
والحرة تلبس خلخالها
لايق عليها وحلالها
يا إبو البنيه
صبرك شويه
وادي الكحيله لخيالها
الشركسي

يا شركسي
يا أبو بندقيه
لا دين لا ذمه
لا إنسانيه
كرباج فى إيدك
والناس عبيدك
والفرده حتى
ع الجلابيه
الوف بطيري
ويلوف بغيري
يا شركسي
يا اللى كلت خيري
شافط عرقنا
كاشف ورقنا
والله سرقنا
يا مصراويه
الشركسي أبو بندقية
الصبر طيب
الصبر طيب
وأصبر وصبري دايما يخيب
سنين طويله
فاتت لا حيله
والعمر غيله
ضاع من إديه
هلا بالحب

هلا بالحب يا لمه هلا به
يصبي القلب
ويخليه صبابه
يدوس ع الشوك
ويوصل للآماني
ونرجع للهوي بعد المتاهه
هلا بالحب يا لمه سفاين
عليها الحنه من خضر الجناين
تجوب البحر وتطوف ع المواين
تلم الشمل
ويزيدوا الصحابه
هلا بالحب يا لمه حمامه
تشيل الشوق
على جناح السلامه
وترسم للهوي
مليون علامه
فى ضي النجمه
وف طي السحابه
هلا بالحب يالمه سواقي
تصب الغنوه
تسرح فى المساقي
أدوق واسقي حبيبي
واللى باقي
يكفى اللمه
ويفيض ع الصحابه
هلا يالحب يا لمه يحبينا
يزود حينا
أنور وزينه
هلا بالحب يجرحنا يداوينا
ونرجع للهوي
بعد المتابه
النداله

يا كارتر يا ندل
حبيبك وصاحبك
وصاحب مراتك
وتبقي انت صاحبه
وصاحب مراته
وكان والده ايضا
مصاحب حماتك
وكان برضه والدك
مصاحب حماته
وطول عمره نافد
على استخباراتك
وشغال جاسوسك
على استخباراته
وقاعد يزود
رصيد ملياراتك
وسارق
وشايل معاك ملياراته
وراجل مامنك
وخاين ضميره
وخايف
وحاطط ف ايدك مصيره
ودابح ف بحبك
الوف الضحايا
ودايس ف طين الدنس
والخطايا
يقوم لما يطبق عليه المحيط
تطنش يا كارتر
وتعمل عبيط
وتخلع
وتنسي الحمار والغبيط
وتاكل عيالك
بدون وجه عدل
صحيح
انت ندل
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 6:20 am

إصحى يا مصر

اصحى يا مصر
اصحى يا مصر
هزى هلالك
هاتى النصر
كونى يا مصر وعيشي يا مصر
مدي اديكى
وطولى العصر
اصحي وكوني وعيشي يا مصر
اصحى يا عامل مصر يا مجدع
وافهم دورك
ف الوردية
مهما بتتعب
مهما بتصنع
تعبك رايح
للحراميه
جهدك عملك
رزق عبالك
عرقك مرقك
ولا يهنا لك
اصحى يا عا مل
غير حالك
صون المصنع
واصنع مصر
اصحى وكونى وعيشي يا مصر
اصحى يا زارع مصر الخضره
قدره وخضره
ونور وجمال
ابدر غيطك
واحمى البدره
ضد الافه
والاستغلال
ارضك عرضك
باب الدار
صبحوا مداسه
للسمسار
نعطش
ولانشربش عكار
وصفه قالوها الحكما يامصر
اصحى وكونى وعيشي يا مصر
واصحى يا جندى
يا تار الشهدا
عمى وخالك
اختى واخوك
لجل ما تهدا وتارك يهدا
فرغ نارك ف اللى خانوك
يابن الشعب يا حامي الشعب
انت املنا فى يوم الصعب
اصحى يا جندى ودق الكعب
حرر مصر وطهر مصر
اصحى وكوني وعيشي يا مصر

قصيده أول كلام
كلامنا عن ايران
ما لوش طبعا مكان
فى اعلام الخيانه
وصوت الامريكان
لان الامن شايف
بان الأخ خايف
ليلزق على الشفايف
ويلبس فى الودان
كلام عن الخيانه
ومن عالم جعانه
فتظهر الادانه
على الشاه اللى خان
ادانه يعنى ثوره
ما تقبلش المناوره
وفضح وكشف عوره
واخر بهدلان
فليه الامن يرضى
يبحبح للمعارضه
دى عالم يابا مرضى
واغلبهم جعان
وهكذا الطريقه
طناش
على الحقيقه
فتبقى الناس
غريقه
وتسمع شقلبان
لهذا
او لذلك
حنمشى فى المسالك
ونطلع م الزمالك
نخش الترجمان
وكلمتنا نقولوها
حليب من بز أبوها
فناسنا يسمعوها
فيحصل بغبغان
فهات ودنك يا خلي
اقولك وانت قوللي
وسيبك م اللي واللي
ونحكى
عن ايران
شجرة لو

يا اماني يا شجره ف بستاني
بتفرع يا ما وتعلو
وبيستناها الفكهاني
ولا تطرح غيركلمه لو
لوأغمض وافتح تانى
الاقينى طاير فى الجو
والشمس عروسه مقابلانى
بالطرحه الدهبي وبالضو
لاخطف طرحتها وفرحتها
وانزل فى اللحظه وفى التو
ابدر انورها واشواقي
ع الارض تنور تحلو
والمس بالكف المتحني
ع الزرع يبشر ويمني
والحب يرعرع
ويغني
والعمر يهني
ويغلو
ويقوموا الناس فى الفجريه
والصبح بيضحك هأ او
والليل بعيونه الحراميه
بيعيط خايف م العو
وامانى كتيره مشاغلانى
ممكن تتحقق يوم او
على راي صاحبنا البستانى
لو تطرح يوم شجره لو
دعاء الكروان

دار الفلك
فى المغزلك
طول السنين
ما أمهلك
ياناسج الروح
ف الحياة
الحب لك
والخلد لك
انت الازل
وانت الابد
والهالك
اللى يجهلك
يا شعب
يا نبض الوجود
الحكم لك
والملك لك . الملك لك . الملك لك
الليل حلك
والبوم
سلك
والبحر
عطشان منهلك
والسهم طاش
اسقي العطاشى
انت الكريم
وبنسالك
يهوذا خان ؟
اكم يهوذا
وباع مسيح
لا يهوذا دام
ولا جرح
بيلازم جريح
مليون يهوذا
خان امانك
وانهلك
وفضلت باقي
ع السواقي ومنحلك
يفرش حصير القمح
فوق دم المسيح
وانت الجريح
تيجى الاطبا وتسألك !!
ما اعجبك
ما انحبك
ما احملك
يا شعب
يا روح الخلود
ما انبلك
الحكم لك
الملك لك الملك لك
تاجر

تاجر نزل سوق
شاف غزاله
مع الدلال
قرب يدوق العسل
نهر الدموع شلال
شرب عديم التنا
من دمعنا المسفوح
زاد فى السعار والغنا
من خسه الدلال
اخص
اخص
اخص .. على كده
أخر الكلام

وآه يا خي اه
ياخي
كنا نملا الدنيا ضي
بس اه
لو كنا زي
الف اه
واه يا خي
كنا جبنا الشمس
من برج الاسد
واديناها للعيال
غزل البنات
يطبعوها ع الهدوم
والكراسات
يشبكوها
ورد شعور البنات
ينظموها
عقد من شر الحسد
يضوي نوره
لما يضوي
كل حاره وكل حي
بس اه لو كنا زي
الف اه
واه ياخي
كنا المظلوم اذا هاجم
جري
كنا لو كان السلاح فى يدنا
والمعارضه
يد واحده عندنا
دسنا شاهنا
وامريكانه بنعلنا
وابتدينا الثوره
من اوسع طريق
كان تمنتاشر يناير
ف الشوارع لسه حي
بس اه
لو كنا زي
الف اه
واه ياخي
يا فلسطينية

يا فلسطينية
والبندقاني رماكو
بالصهيونية
تقتل حمامكو في حداكو
يا فلسطينية وأنا بدي اسافر حداكو
ناري في أيديه
وإيديه تنزل معاكو
على راس الحيه
وتموت شريعة هولاكو
يا فلسطينية
والغربة طالت كفاية
والصحرا أّنت م اللاجئين والضحايا
وألارض حنّت للفلاحين والسقايه
والثورة غاية
والنصر أول خطاكو
يا فلسطينية
والثورة هي الاكيدة
بالبندقية نفرض حياتنا الجديدة
والسكه مهما طالت وبانت بعيدة
مدّ الخطاوي
هوه اللي يسعف معاكو
يا فلسطينية
فيتنام عليكو البشارة
بلنصرة طالعة
من تحت ميت ألف غارة
والشمعة والعه
والامريكان بالخسارة
راجعين حيارى
عقبال ما يحصل معاكو
بلح ابريم

يابلح ابريم يا سمارة
سواك الهوي ف العالي
هويت
على طمى النيل ياسمارة
وشربت عكار
لما استكفيت
بس احلويت قوي يا سمارة
لما اسمريت قوي ياسمارة
لفيت الشارع و الحارة
على زى نقاوتك فين
ما لقيت
يا حلاوة بنار
يا حلاوة بنار الشمس النور
يا سمارة وعمار الصحرا البور
شباك الهوى
داير ما يدور
اتاريك دبت وطبيت
بس اغلويت قوي ياسمارة
لما اتدليت قوى ياسمارة
ونزلت الشارع الحارة
سوقك
لا رخصت ولا اتذليت
يابلح ابريم
ياسمارة
حصنت بعقدك صدر الناس
من شر النخاس الخناس
يابو قلب لا سوسه
ولا سواس
ورقيتك يا اسمر
واسترايت
الضم حبابيك بقي ياسمارة
وافتح شبابيبك لقا يا سماره
على جو الشارع
والحاره
تحلو زيادة
وتملا البيت
يا بلح ابريم يا سماره
الخط دا خطي

الخط دا خطي
والكلمة دي
ليا
غطى الورق غطي
بالدمع يا عنية
شط الزتون شطي
والارض عربية
نسايمها انفاسي
وترابها من ناسي
وان رحت انا ناسي
ما تنسانيش هى
والخط دا خطي
والكلمة دى ليا
لاكتب على عينى
يحرم عليكى النوم
واحبس ضيا عينى
بدموعى طول اليوم
قبل الوفا بديني
زي الصلا والصوم
والدين فى عرف الحر
هم ومذلة ومر
وشجون تصون وتجر
احزان مخبية
والخط دى خطي
والكلمة دى ليا
لاكتب على كفي
والحبر من دمي
ياهمتي كفي
يا عزوتى ضمي
اول ما ح نوفي
بالوعد
ح نسمي
باسم اللى ماتوا صغار
فى المدرسه والدار
والمصنع اللي انهار
فوق الصنا يعية
والخط دا خطي
والكلمة دى ليا
مٌر الكلام
مٌر الكلام
زي الحسام
يقطع مكان ما يمر
اما المديح سهل ومريح
يخدع صحيح ويغٌر
والكلمة دين
من غير إيدين
بس الوفا
ع الحر
النيل عطشان
النيل عطشان يا صبايا
للحب والحنين
والشط
لانور
ولا نسمه
ولا ناي
ولا عود يا سمين
****
يا شاهنده وخبرينا
يا ام الصوت الحزين
يا ام العيون جناين
يرمح فيها الهجين
ايش لون سجن القناطر
ايش لون السجانين
ايش لون الصحبه معاكي
نّوار البساتين
كلك محابيس يا بلدنا
وهدومك
زنازين
وغيطانك الوسايع
ضاقت ع الفلاحين
والدخان في المداخن
لون هم الشغالين
***
يا بنات النيل يا سبايا
ف حبال الجلادين
ما بقاش في زمانكم عنتر
لكن فيه الملايين
فارس محسوب الخطوه
يتحرك بالقوانين
لحظة ما تحين الساعة
يركب ضهر التنين
ويحطم الحواجز
ويفك المساجين
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 6:31 am
حرب الشعب
ماتقولليش
ماتعدليش
حرب الشعب وغيرها مافيش
حاس يامصاروه
حاس ياولاد
حاس يامداين
حاس يابلاد
حسنا ياناسنا وداسنا الغول
عض بلدنا
عرض وطول
ماتقولليش الجيش مسؤل
جيش من غير شعب
مايمشيش
حلاويلا
حلاويلا يا حلاويلا .. يا خسارة يا حول الله

ده الثوري النوري الكلمنجي .. هلاب الدين الشفطنجي
قاعد في الصف الاكلنجي ... شكلاطة و كاراميلا ..

يتمركس بعض الايام ... يتمسلم بعض الايام
و يصاحب كل الحكام .. و بسطعشر ملة ..

حلاويلا يا حلاويلا .. يا خسارة يا حول الله

يا حلاولو لو شفتو زمان .. مهموم بقضايا الانسان
بيتكتك لتقول بركان .. و لا بوتجاز و لا حلة ..

حلاويلا يا حلاويلا .. يا خسارة يا حول الله

اش حالك يا قريب اليوم .. اش جاب التفاح للدوم
و اش جاب الغرفة ببدروم ... للعربية و فيلا

حلاويلا يا حلاويلا .. يا خسارة يا حول الله

جرانين و منابر و ادارة .. و معلق طلبة و زمارة
يعطل أهو بيسلك يابا .. و يجيبوا المنافيلا

حلاويلا يا حلاويلا .. يا خسارة يا حول الله

دا ترستق هلاب الدين .. بقى عاقل جداً و رزين
و يعن عند المجانين .. إن عشنا و متنا بعلة

حلاويلا يا حلاويلا .. يا خسارة يا حول الله
جيفارا مات
جيفارا مات
جيفارا مات
آخر خبر فِ الراديوهات
و فِ الكنايس
و الجوامع
و فِ الحواري
و الشوارع
و عَ القهاوي و َ البارات
جيفارا مات
جيفارا مات
و اتمد حبل الداردشة و التعليقات
********
مات المناضل المثال
يا ميت خسارة عَ الرجال
مات الجدع فوق مدفعه جوّه الغابات
جسّد نضاله بمصرعه
و من سُكات
لا طبالين يفرقعوا
و لا اعلانات
********
ما رأيكم دام عزكم
يا انتيكات
يا غرقانين
فِ المأكولات و الملبوسات
يا دفيانين
و مولعين الدفايات
يا محفلطين (1)
يا ملمّعين يا جيمسنات
يا بتوع نضال آخر زمن
ف العوامات
ما رأيكم دام عزّكم
جيفارا مات
لا طنطنة
و لا شنشنة
و لا إعلامات و استعلامات
عيني عليه ساعة القضا
من غير رفاقه تودّعه
يطلع أنينه للفضا
يزعق و لا مين يسمعه
يمكن صرخ من الألم
من لسعة النار فِ الحشا
يمكن ضحك
أو ابتسم
أو ارتعش
أو انتشى
يمكن لفظ آخر نفس كلمة وداع
لَجل الجياع (2)
يمكن وصية للي حاضنين القضية
بالصراع
صور كتير ملو الخيال
و ألف مليون إحتمال
لكن أكيد و لا جدال
جيفارا مات موتة رجال
*******
يا شغالين و محرومين
يا مسلسلين (3)
رجلين و راس
خلاص خلاص
مالكوش خلاص
غير البنادق و الرصاص
دا منطق العصر سعيد
عصر الزنوج و الامريكان
الكلمة للنار و الحديد
و العدل أخرس أو جبان
صرخة جيفارا يا عبيد
في أي موطن أو مكان
ما فيش بديل
ما فبش مناص
يا تجهّزو جيش الخلاص
يا تقولو عَ العالم
خلاص
سقطت سايغون (1)
كلمات : أحمد فؤاد نجم
غناء : الشيخ إمام
أبجد هوز .. حطي كلمن
إقلب صفحة .. امسك قلم ٌ
اكتب زي الناس ما بتنطق
سقطت سايغون رفعوا العلم ٌ
..........
طلعت شمس اليوم ده أغاني
كل ما نسمع نعشق تاني
طلعت شمس اليوم ده حريقة
تكوي الجرح و تبري الالم ٌ
.....
سايغون عادت للثوار
فوق الدم و تحت النار
جدّوا فوجدوا .. زرعوا فحصدوا
و إحنا إيدينا للسمسار
و إللي قالوه السمسارجية
و اللي حكاه السمساردار
لما قروه القرونجية
بالمستعجل و المندار
هشت و نشت يعزم الصوت
عن أمريكا و هول أمريكا
زعموا الفانتوم حامل موت
سقط الكوت بعلم أمريكا
جاتكو فضيحة يا طبقة سطيحة
و عاملة فصيحة و جايبة العار
فصحانجية و كلمانجية و سمسارجية
و سمسار دار
يا عرب ( باللهجة المصرية )
يا عرب .. يا عرب .. يا عرب في أي مصر
يا عرب .. يا عرب .. اسمعوا صوت شعب مصر
أحفظوا لمصر المكان .. و احنا عالعهد اللي كان
مصر أوفى من الزمان ..
و انتو عارفين شعب مصر
يا عرب يا عرب يا أهل مصر
----------------------------
اللي خانوا العهد بينا .. و استباحوا كل حاجة
و استهانوا بالعروبة .. و استكانوا للخواجة
مستحيل حيكونوا منا .. نحنا حاجة و هما حاجة
هما باعوا الجلابية .. و الوطن و البندقية
و ا حنا أصحاب القضية ..
احنا ما بنبيعش مصر
يا عرب يا عرب يا أهل مصر
----------------------------
يطلع الدجال بزيفو .. يملا وادي النيل ضباب
ينزل الجلاد بسيفو ... يزرع الموت و الخراب
يطول الليل زي كيفو .... الصباح له ألف باب
و احنا بوصلتنا بإيدينا .. ما تخافوش من الليل علينا
مهما غبتو عن عينينا ..
انتو جوا بقلب مصر
يا عرب يا عرب يا أهل مصر
-------------------------
سينا و لا .. يافا و لا .. حيفا ولا ... دير ياسين
اسألوا الشمس اللي هالة .. عللي صحيوا مبدرين
يزرعوها نور و غلة .. دول جدودنا و لا مين ؟
حقنا و حتما ً يُعاد .. بس لو بانت سعاد
و البيان ده لوه معاد ...
و المعاد حيكون في مصر
يا عرب يا عرب يا أهل مصر
اتجمعوا العشاق
اتجمعوا العشاق في سجن القلعة ... اتجمعوا العشاق في باب الخلق
و الشمس غنوة من الزنازن طالعة .. و مصر غنوة مفرعة في الحلق
تجمعوا العشاق بالزنزانة .... مهما يطول السجن مهما القهر
مهما يزيد الفجر بالسجانة .. مين اللي يقدر ساعة يحبس مصر
...............
تجمعوا و العشق نار في الدم ..... نار تحرق الجوع و الدموع و الهم
نار تشتعل لما القدم ينضم .... لما الايادي تفور في لم اللحم
و اللحم متنتور في رملة سينا .... و الكدب بيحجز على أيادينا
قدم العدو غارسة في لحم ترابي ... و الكدب عشش مخبرين على بابي
و المخبرين خارجين كلاب سعرانة ... بيجمعوا العشاق في الزنزانة
...............
مصر النهار يطلقنا في الميادين .. مصر البكا .. مصر الغنا و الطين
مصر الشموس الهالة من الزنزانين .. هالة و طارحة بدمنا بسا تين
مصر الجناين طرحة مين يقطفها .. مصر الجناين للي يرفع سيفها
مهما يطول السجن مهما القهر .. مهما يزيد الفجر بالسجانة
مين اللي يقدر ساعة يحبس مصر

--------------------------------------------------------------------------------
غابة
غابة كلابها ديابــــا ... و نازلين في الناس هـم
و اللي ينام في الغابة ... رح يتاكل هــــــــم
و اللي يدور وشـــــو ... في غمضة عين يتهــــــم

و اللي يغيب عن جحرو .. لاجل القوت و المم
يتخان من ورا ظهرو ... او يتاخد خم
غابة بتاكل ميتة ... غابة بتشرب دم
غابة كلابها ديابا ... نازلين بالناس هم
غابة و ناسها غلابة .. خيخة لا ناب و لا فم
متكلين عالصدفة .... متاكلين بالهم
و احنا يا ملح الغابة .. هم يحرك هم
ضايعين و سط ديابا .. مش فاضيين نهتم
فاهمين و بنتغابا ... مش راضيين نتلم
--------------------------------------------------------------------------------
برولوج
شعر أحمد فؤاد نجم
----------------------------------------
يا ليل يا عين ما اعرفش اكدب
طب و اكدب ليه
عدم المؤاخذة
لنا باكتب
و لا أبصر إيه
لا انا احترافي اشتراكية
و لا عندي نزعة رجعيّة
لكني شايف بعنيّه
يا فلاحين يا صنايعية
بر الأمان بان
و المركب
راح ترسي عليه
و انا حاكدب ليه
1971
--------------------------------------------------------------------------------
نكسون
شرفت يانكسون بابا يا بتاع الوترغيت
عملولك ايمة وسيمة سلاطين الفول و الزيت
فرشولك اوسع سكة من راس التين على مكة
وهناك تنفد على عكا ويقولوا عليك حجيت
____________________________________
عزموك فقالوا تعالا تاكل بابمبون وهريسة
امت لانك مهيف سدءت انحنا فريسة
هات وشك خودلك تفة طبعا شلا يا صحاب البيت
___________________________________
خد منى كلام يبئالك ولونك موش حتعيش
لاحؤول أهلا ولا جهلا ولاتجى ولا ماتجيش
بيقولوا اللحم المصرى مطرح مابيسرى بيهرى
ودا كولوا من تاثير الكوشرى والفول أبو سوس بزيت
--------------------------------------------------------------------------------
هما مين و إحنا مين ...
كلمات الشاعر : أحمد فؤاد نجم
غناء : الشيخ إمام

هما مين و إ حنا مين .. ؟
هما الأمرا و السلاطين ..
هما المال و الحكم معاهم ..
و إحنا الفقرا المحرومين
حزر فزر شغّـل مخك
شوف مين فينا بيحكم مين ؟!!
..............
إحنا مين و هما مين ..
إحنا الفعلا البنايين
إحنا السنة و إحنا الفرض
إحنا الناس بالطول و العرض
من عافيتنا تقوم الارض ..
و عرقنا يخضر بساتين
حزر فزر شغل مخك
شوف مين فينا بيخدم مين ..؟؟!!
................
هما مين و إحنا مين ؟؟
هما الامرا و السلاطين
هما الفيلا و العربية
و النساوين المتنقية
حيوانات استهلاكية
شغلتهم حشو المصارين
حزر فزر شغل مخك
شوف مين فينا بياكل مين ..؟؟!!!
....................
إحنا مين و هما مين
إحنا قرنفل على ياسمين
إحنا الحرب : حطبها و نارها
و إحنا الجيش اللي يحررها
و إحنا الشهدا بكل مدارها
منكسرين أو منتصرين
حزر فزر شغل مخك
شوف مين فينا بيقتل مين ..؟؟!!!
................

هما مين و إحنا مين
هما الامرا و السلاطين
هما مناظر بالمزيكا
و الزفة و شغل البوليتيكا
و دماغهم طبعاً استيكا
بس البركة بالميازين
حزر .. فزر شغل مخك
شوف مين فينا بيخدع مين ..؟؟؟!!!
.....................
هما مين و إحنا مين
هما الامرا و السلاطين
هما بيلبسوا أخر موضة
و إحنا بنسكن سبعة في أوضة
هما بياكلوا حمام و فراخ
و إحنا الفول دوخنا و داخ
هما بيمشوا بطيارات
و إحنا نموت بالاوتوبيسات
هما حياتهم بامب جميلة
هما فصيلة و إحنا فصيلة

حادي يا بادي يا عبد الهادي
يا اللي عليك قصد الغنوادي ( الغنوة دي أو هذه الاغنية )
لما الشعب يقوم و ينادي
يا إحنا يا هما في الدنيا دي
حزر فزر .. شغل مخك
شوف مين فينا حيغلب مين
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 6:53 am
البحر بيضحك ليه
البحر بيضحك ليه
وانا نازله ادلع املا القلل
البحر غضبان ما بيضحكش
أصل الحكاية ما تضحكش
البحر جرحه ما بيدبلش
وجرحنا ولا عمره دبل
مساكين بنضحك من البلوة
زي الديوك و الروح حلوة
سارقاها من السكين حموة
و لسة جوا القلب أمل
قللنا فخارها إناوي
بتقول حكاوي و غناوي
يا قلة الذل أنا ناوي
ما شرب و لو في المية عسل
والبحر بيضحك ليه … ليه
وانا نازلة ادلع املا القلل
ياما ملينا وملينا
لغيرنا وعطشنا ساقينا
صابرين وبحر ما يروينا
شايلين بدال العلة علل
والبحر بيضحك ليه … ليه
وانا نازلة ادلع املا القلل
في بالي ياما وعلى بالي
واللي بيعشق ما يبالي
ما يهمنيش من عزالي
يا حلوة لو مرسالي وصل
والبحر بيضحك ليه ليه
وانا نازلة ادلع املا القلل
بيني وبينك سور ورا سور
وانا لا مارد ولا عصفور
في إيدي عود قوال وجسور
وصبحت انا في العشق مثل
والبحر بيضحك ليه
وانا نازله ادلع املا القلل

كلمتين ( إلى مصر )
كلمات : أحمد فؤاد نجم
غناء : الشيخ إمام
............................
كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
..........................
شابة يا أم الشعر ليلي
و الجبين شق النهار
و العيون بحرين أماني
و الخدود عسل و نار
و اللوالي ( اللؤلؤ) بابتسامتك
يحكوا أسرار المحار
يللي ساكنة القصر عالي
إيمتى يهنالي المزار
كلميني يا صبية
طال علي َّ الانتظار
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
.....................
قصرك المسحور غيلانو
أغبى من دود الغيطان
بعد مص الغصن الاخضر
ينحتوا عضم العيدان
و اللي خلى الارض خضرا
و اللي خلى الدار آمان
عاش بجور ملو جوفه
مات بخوفه من الغيلان
طوّع الغلبان
ما قالش عن شقا العمر اللي كان
كلمتين بمصر يبقوا
هما أخر كلمتين
حد ضامن يمشي آمن
أو مِـآمن يمشي فين
....................
أدي كلمة من عذابي قلتهالك
باقي كلمة
من حنيني صنتهالك
في الضلوع من دنيا ظلمة
كنت خايف يلمحوها
يقتلوها في سكة ظلمة
سقسقت و النور بشاير بشاير
زهرة الصبار يا سلمى
يا نسيم الشوق يا طاير يا طاير
خد لمصر في الصبح كلمة
طول ما يبقى الركب ساير
بالبصاير و العينين
يبقى ضامن يمشي آمن
يبقى عارف يمشي فين
الممنوعات
ممنوع من السفر
ممنوع من الغنا
ممنوع من الكلام
ممنوع من الاشتياق
ممنوع من الاستياء
ممنوع من الابتسام
وكل يوم فى حبك
تزيد الممنوعات
وكل يوم باحبك
اكتر من اللى فات
حبيبتى يا سفينه
متشوقه و سجينه
مخبر فى كل عقده
عسكر فى كل مينا
يمنعنى لو أغير
عليكى أو أطير
بحضنك
أوأنام
فى حجرك الوسيع
وقلبك الربيع
اعود كما الرضيع
بحرقة الفطام
حبيبتى يا مدينه
متزوقه وحزينه
فى كل حاره حسره
وف كل قصر زينه
ممنوع من انى اصبح
بعشقك او ابات
ممنوع من المناقشه
ممنوع من السكات
وكل يوم فى حبك
تزيد الممنوعات
وكل يوم بحبك
اكتر من اللى فات
القاهرة /1976
التحالف
يعيش اهل بلدى
وبينهم مفيش
تعارف
يخلى التحالف يعيش
تعيش كل طايفه
من التانيه خايفه
وتنزل ستاير بداير وشيش
لكن فى الموالد
يا شعبى يا خالد
بنتلم صحبه
ونهتف يعيش
يعيش اهل بلدى
يعيش النثقف على مقهى ريش
يعيش يعيش يعيش
محفلط مزفلط كتير الكلام
عديم الممارسه
عدو الزحام
بكام كلمه فاضيه
وكام اصطلاح
يفبرك حلول المشاكل قوام
يعيش المثقف
يعيش يعيش يعيش
يعيش اهل بلدى
يعيش التنابله
فى حى الزمالك
وحى الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك
اذا عزت توصف حياتهم
تقول الجياه عندنا
مش كذلك
وممكن تشوفهم فى وسط المدينه
اذا مر جنبك
أتومبيل سفينه
قفاهم عجينه
كروشهم سمينه
جلودهم بتضوى
دماغهم تخينه
سنانهم مبارد تفوت فى الجليد
ما فيش سخن بارد
بيكلوا الحديد
ما دام نهر وارد
وجاى م الصعيد
تزيد الموراد
كروشهم تزيد
وتسمع وتسلم
بأن التنابله
أو الأكلين
حيسمع كبيرهم
ويعمل مقابله
مع الفلاحين
ويحصل تحالف
ما بين الجميع
ونملا المصارف
بدم القطيع
أطيع الخليفه
وأطيع والديك
دا مفروض عليك
تزرع وتبعت لحى الزمالك
وحى الزمالك
مسالك مسالك
تحاول تفكر تهوب هنالك
تودر حياتك بلاش المهالك
لذلك
أذا حد جابلك سيرتهم
تبسمل تكبر
وتهتف كذلك
يغيش التنابله
يعيش يعيش يعيش
يعيش اهل بلدى
يعيش الغلابه
فى طى النجوع
نهارهم سحابه
وليلهم دموع
سواعد هزيله
لكن فيها حيله
تبدر تخضر جفاف الربوع
مكن شغل كايرو
ما يتعبش دايره
لا ياكل
ولا حتى يقدر يجوع
يا غلبان بلدنا
يا فلاح ياصانع
ياشحم السواقى
يا فحم المصانع
يا منتج
يا مبهج
يا آخر حلاوه
يا هادى
يا راضى
يا عاقل
يا قانع
ما تتعبش عقلك
فى شغل السياسه
وشوف انت شغلك
بهمه وحماسه
وعود عيالك فضيلة الرضا
لأن احنا طبعا
عبيد القضا
ورزقك ورزقى ورزق الكلاب
دا موضوع مؤجل ليوم الحساب
كمان الصحافه
جتكتب فى حالتك
وتنشر مناظر لخالك وحالتك
وتتطلع يامسعد عليك الغناوى
وتسمع بأسمك
فى قلب القهاوى
تحبك مشيره وبنات الجزيره
وقصة غرامك
تشيع فى الرداوى
يعيش عم مسعد
يعيش يعيش يعيش
الرجوع الى أعلى الصفحة اذهب الى الأسفل
https://westelbald.yoo7.com/
Wa7iD
المدير العام
Wa7iD


ذكر عدد الرسائل : 3376
العمر : 46
العمل/الترفيه : محامى
تقييم العضو : 0
تاريخ التسجيل : 27/07/2007

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالإثنين 22 أكتوبر 2007, 6:55 am
جائزة نوبل
كلمات أحمد فؤاد نجم وكتبها بمناسبة معاهدة السلام وحصول مناحم بيجن على جائزة نوبل
شوف عندك يا سلاملم
واتفرج يا سلام
مواطن شخص عادى
مالوش اى اهتمام
ومبارك الخيانه
ومسميها السلام
وف يوم قرا الجرايد
تاريخ ما اعرفش كام
من يومها يا ضنايا
بيشقلب فى الكلام
واتفرج يا سلاملم
اتفرج يا سلام
على شقلب يا سلام
لنا محانم جيبن يادخ
زايجة لوبن
يعنى مناحم بيجن
ياخد جايزة نوبل
تبقى النوديا يعنى الدنيا
ماشيه بتحدف بالمندار
يبقى الشهر اتناشر ساعه
يبقى اليوم ليلتين ونهار
يبقى القاتل شحص ضحية
والمقتول مجرم جبار
شفتوا ازاى ؟
اما صحيح الطب اتقدم
وحنا ما وصلناش أخبار
أيوه يا لجنة لوبن بيه
قاعدة بتلجنى ايه
أنا مش فاهم حاجه صراحه
لما القاتل ياخد جايزه
كده من دون تلبيخ وأباحه
يبقى يا أما اللجنه دى بايظه
او لامؤاخذه رئيسها حمار
يبقى يا لجنه يا عره يا كوسه
جتنا وجاتكو ستين حوسه
تبفى ف هذا الزمن المايل
ياما حنجرى علينا هوايل
تبقى اللكمه بدل الكلمه
والكاتب يمسك منشار
يبقى الراعش يعنى الشاعر
يسكن شقة فى بيت ف قصيده
يكتب فول ياكل أشعار

مرحبا
بعد السلام والمرحبا
يا اولاد بلدنا يا طيبين
نفرش كلام المصطبة
واضح لكل السامعين
مصر الحبيبة الطيبة
أم البنية (بتشديد الياء) والبنين
ايش حالها في عز الصبا
ايش حال ولادها المخلصين
وسط العواصف مركبة (سفينة)
بين ريح شمال وريح يمين
جابوا الطبيب ابن الحلال
كشف مكان الداء وشاف وقال
أهل البصيرة في البلد
جواب لكل السائلين
قال البلد عاوزه ولد
ياخد بطار (ثأر) المظلومين
ولد يعوض اللي راح
ويعلا فوق كل الجراح
ويمد إيده في الضباب
يشد أنوار الصباح
فيكم ولد يا سامعين ؟
(يرد الكورس): أجدع ولد
طب هوه فين ؟ وهوه مين؟
كورس: ابن البلد
يا ابن البلد يا ابن البلد
الوقت وقتك يا ولد
يا قلب مصر ونبضها
كورس: يا ابن البلد يا ابن البلد
يا صبحها
كورس: يا ابن البلد
يا ربحها
كورس: يا ابن البلد
يا قمحها
كورس: يا ابن البلد
يا رمحها
كورس: يا نور سماها وأرضها
آدي كلام المصطبة يا اولاد بلدنا يا طيبين
بعد السلام والمرحبا واضح لكل السامعين
ورقه .. من ملف القضية
انت شيوعى
انا مصراوى
انتومصايب
انتو بلاوى
ممكن اعرف مين الأول
بيكلمنى
احنا نيابة أمن الدولة
دولة مين
دولة مصر
مصر العشه
ولآ القصر
أيوه حنبدى ندور ونلف
حاجه تنرفز خالص
اف
مالك.. شايل طاجن خالك
لم لسانك ما تخرفش
أنا ما اقصدش اهانتك طبعا
ايوه استعبط
لا ما اعرفش
ايه رأيك فى سفارة كوريا
ايه رأيك فى قضية مصر
مصر فى وحده
هى وسوريا وليبيا
ولازم ييجى النصر
ييجى منين و ازاى ولمين
آدى كلام الشيوعيين
أنا من حقى
حق فى عينك
أنا بتكلم بينى وبينك
يعنى كلام بره التحقيق
اذا كانش يسبب لك ضيق
طيب فول
مين مسؤل ؟
مين مسؤل عن ايه يا أخينا
ع اللى جرى لنا ف غزه وسينا
أنت شيوعى أكيد وطاوعنى
فض دمغك من دى قضيه
شعبنا جاهل
مهما تقول له
مش حيآمن بالشيوعيه
ما الشيوعيه فى فيتنام
ايه رأيك فيهم يا همام
مش بطال مش بطال
لكن احنا .. ورانا عيال
طب ما نحارب
لجل عيالنا
يطلعوا أسعد من اجيالنا
انت الظاهر مخك فاضى
وحتتعبنى معاك ع الفاضى
وأنا بحبت معاك بكفايه
ابقى اتفلسف عند القاضى
هى قضية ؟
لأ ملوخية
آمال فاهم ايه آمال
هى الدوله دى لعب عيال
ممكن أعرف أنا هنا ليه
أيوه حتعرف
أمال ايه
يوم خمسه وعشرين الماضى
ايه مشاك عند التحرير
تحرير ايه يا جناب القاضى
أنا مش فاضى
بكره تصير
بطل غلبه وجاوب دوغرى
أنا غلباوى كده من صغرى
كل الشيوعيين امثالك
آخر غلبه وقلة ذوق
يحصل ايه لو تمشى فى حالك
فاكر نفسك مين
ما تفوق
لو راح افوق
مش من مصلحتك
أما معجب جدا بصراحتك
أيه رأيك فى حكاية الطلبه
حاجه عظيمه بشرة خير
انت دماغك ينفع جزمه
وانت لسانك ينفع سير
أخرس قطع لسانك سافل
كتر خيرك
مخك قافل
مين وداك بقى عند الطلبه
رايح ضمن المندسين
رحت أناقشهم واسمع منهم
تسمع منهم ايه ياسى طين
دول عايزيين الدنيا تولع
علشان اصلا
مش فاهمين
هى الحرب يا عالم لعبه
دى بتتكلف بالملايين
وانت حتدفع ايه من جيبك
امال حدفع من جيب مين
انت حمار وخدوك فى مشمك
رحت هناك زى الباقيين
عاملين لجنه
وقال وطنيه
مش ممكن دول وطنيين
وجماعة انصار الثورة
وفلسطين وهباب الطين
ما نخلينا يا سيدى فى حالنا
مالناومال الفدائين
هو احنا اللى نهبنا بلدهم
دول عالم صيع فاقدين
قتلوا الراجل عند الشيرتون
واحنا اللى طلعنا القاتلين
وصفى التل ده كلب وخاين
اهو كل العالم خاينين
واحد صاحبى مراته مرافقه
وهو مرافق
ييجى عشرين
أمريكا بتزعل وبتحزن
هو احنا يا عالم ناقصين
مش نستعبر
م اللى جرالنا
ونعيش بقى زى العايشين
دى عيال عملا للشيوعيه
واحنا عدو الشيوعيين
روق دمك بس يا بيه
مين مساعدكو بفالو سنين
بيساعدونا صحيح يا سى بعجر
علشان أصلا مش فاهمين
احنا حليتنا منين نديهم
ونسددهم بالملايين
يمكن يعنى قضية مبدأ
مبدأ مين وزكايب مين
هى دى عالم تعرف مبدأ
دول بقول لك
ناس مجانين
اخترعولنا السد العالى
علشان نبقى اشتراكيين
اشتراكيه هناك فى بلدهم
واحنا فى دارنا
نعيش حريين
عايزيين الفلاح الجاهل
يتساوى بالمحترامين
وكمان قال
تحديد ملكيه
أبو ألفين
يدوه خمسين
شغل ملاحده وعالم كفره
ومخالفين احكام الدين
والعمال راخرين اسم الله
فاهمين روحهم
بنى آدميين
ناس عايزين الحرق بولعه
دا كله من الشيوعيين
نشروا لنا الأفكار السوده
أولاد الكلب الملاعين
مين وداك بقى عند الطلبه
انطق قول
اتكلم مين
هما ايه مطالبهم ؟
انت حتستجوبنى يا شاطر
لأ مش قصدى
بس أنا بسأل
كانو طالبين كراريس ومساطر
ولا مطالب ميه الميه
كل الشعب مآمن بيها
دول طالبين حرب وشعبيه
مين مجنون بقى
حيمشيها
عايزين يدوا الرتش سلاح
عشان تحصل فيها مجازر
أنا لو أشوف حلوف فلاح
شايل شومه
لازم اهاجر
لازم بينه وبينك دم
دم ف عينك
هس اتلم
ثم نحارب ليه
وبأيه
بسلاح ما يموتش بعوضه
روق دمك بس يا بيه
الحرب ضروره ومفروضه
واهو نفس سلاحنا المظلوم
فى فيتنام دابح أمريكا
دى طبيعه أرض يابتى آدم
بطلوا بقى كدب وبولوتيكا
طب ما الهند بنفس سلاحنا
فى باكستان
بعزقت الغرب
رأيك يعنى ضرورى ان احنا
وحتما يعنى نخش الحرب
طيب
حاضر
فين المخبر
حتغير رأيك
بالضرب يناير
1973
الرجوع الى أعلى الصفحة اذهب الى الأسفل
https://westelbald.yoo7.com/
بنت أفندينا

بنت أفندينا


انثى عدد الرسائل : 12
العمر : 38
تقييم العضو : 1
تاريخ التسجيل : 25/10/2009

قصائد احمد فؤاد نجم Empty
مُساهمةموضوع: رد: قصائد احمد فؤاد نجم   قصائد احمد فؤاد نجم I_icon_minitimeالثلاثاء 27 أكتوبر 2009, 10:01 pm
الله عليك ياعم نجم لما ترفرف كلمتك وتعلى فوق كل الرؤس
الله عليك لما تزود همتك وتكتب عن اللى سرق واللى نهب
وف النهايه حاز كوؤس
الله عليك لما بتفرد حزننا على شعر بنت بتنعى حظها
علشان جبتها امها لزمن منحوس
متقولى ايه سر ازدهارك ومنين طلوعك للقمر يابو نور فشر نور الفانوس
متخافش مش راح احسدك دنا عينى مليانه يا سيدنا وكلامى ده بيمجدك
وربك عالم بالنفوس



[b]
الرجوع الى أعلى الصفحة اذهب الى الأسفل
 
قصائد احمد فؤاد نجم
الرجوع الى أعلى الصفحة 
صفحة 1 من اصل 1
 مواضيع مماثلة
-

صلاحيات هذا المنتدى:لاتستطيع الرد على المواضيع في هذا المنتدى
منتدي وسط البلد :: .:: منتدى الحب والادب والشعر::. :: قسم الخواطر والأشعار-
انتقل الى: