حصريا فى منتدى وسط البلد اشعار سياسية ممنوعة من العرض

مجموعة اشعار سياسية لشباب شعراء مطحونين فى البلد
حصريا وبلا منافس فى وسط البلد
لاول مرة هذه الاشعار تعرض ونخرج الى النور


كل سنة وانت طيب يا ريس

كل سنة وانت طيب واحنا مش طيبين


كل سنة وانت حاكم واحنا برضه محكومين
واحنا برضه مظلومين ومتهانين


وعلى دماغنا واخدين


كل سنة وانت برضه هابش الملايين


واحنا زى ما احنا للصدقة مستحقين
كل سنة وانت مكلبظ وملظلظ وتخين
وحاشيتك وفامليتك فى لحمنا واكلين


ولعضمنا ممصمصين ولدمنا شافطين
ويا ترى يا حبيب الملايين


فاكرنا ولا برضه منسيين
فاكر العريانين والجعانين والمشردين
فاكر اللى ماتو محروقين


فاكر العبارة واللى ماتوا فيها غرقانين
الله يكون فى عونك هتفتكر مين ولا مين


فى عيد ميلادك الكام وسبعين
بس عايزة اقوللك كلمتين
الاولى شيلتنا طين


والنيل بقى رشاح ومصر متاحة بس للسياح
وعرض البلد بقى مستباح
والاقتصاد سداح مداح
والسرقة بقت كفاح
والتانية ورتنا الويل
والخطوة فى عهدك بقت ميل
والضحك بقى نواح وعويل والفكر عليل
والكوسة عارف الكوسة
ممكن اقوللك فيها مواويل
والتالتة ربى منك عليا حارس
دى المساجد والكنايس والمدارس
بقوا خلاص مخارس
واللى يقول لأ انت عليه دايس
والرابعة الناس من غير خمرة سكرانين
واغلبهم للقمة مش لاقيين
وانت فى لحم الطاووس هايص وعلى ريش النعام نايم والحرير لابس
واحنا الخوازيق لابسين
وانت فين واحنا فين
انت فوق واحنا فى اسفل سافلين
والخامسة امن بلدنا بقى تنين
والعدالة بقت كمالة وكلمة الحق فى الزبالة
والمحاكم اتملت مظالم
والقطاع العام عام
والفساد ساد
وفى جتة بلدنا بيرعى
افتكر لجنابك ايه ولا ايه وكل ذكرى ليك بدمعة
انا كنت حالفة ميت يمين اكملهملك تمانية وسبعين
بس هاكفيهم ورق منين
كل سنة وانت ………….. واحنا طيبين

_____________________________________________________________


قوم يا مصرى شوف اللى جرى
مصرى قوم انهض وتعالى شوف اللى جرى
وكفياك قهاوى ولعب وهزل ومسخرة
فى ناس بتاكل سيمون فيميه وانت بتلحس فى الخرى
الخلق وصلت للقمر وانت ليه بترجع ورا
بلد ماسكها الوحوش وللخلايق كرباج ورا
كبارها عايمين فى الفلوس وانت جيوبك مخرمة
خرم هنا وخرم هنا وخرم تالت من ورا
مسح جوخ علشان العيش والحالة مبقتش ميسرة
الحق مستخبى فى جحوره والباطل بقى شمس منورة
ومر الشكوى قطع لسانك ومر العيش خلاك مرة
مش لاقى تاكل ورايح تجيبلى اتنين موبايل منظرة
وطول مانت كدة سايب ده وده يعمل منك نأورة
والنبى ولا مليون سنة تعدل حالتك المتأخرة
____________________________________________________





________________________________________________________


يا حبيب الملايين
عمرك افتكرت المقهورين الجعانين المذلولين
فاكر اللى اتعذبوا من شعبك زى ما بيسمينا المجرمين
ولا احنا شعبك ولا انت اشتريتنا
احنا شعب مصر عليك غضبانين
احنا اللى شوفنا الويل وفى عصرك متهانين
احنا اللى سرقتم قوتنا ودمنا بقيتوا بايعين
فاكر الاسرى المصريين
فاكر العباره والقطر اللى دخل فى عماره
فاكر كياس الدم اللى لوثها الفاسدين
فاكر المحتاجين والمرضى المطحونين
وفى تأمينك الصحى بقوا كلهم مساكين
فاكر ولا نسيت سرقه الملايين
فاكر اللى هربوا بفلوس المصريين
وحماهم اعوانك اللى كلهم فاسدين
يا ترى اتعلموها فين
اكيد فى مدرستك يا مسكين
ان كنت نسيت ده وده
يا ترى حاتنسى انك ميت واحنا ميتين
يا ترى حاتنسى انك فى الاخره حاتكون من الظالمين
يا ترى حاتنسى انك فى الاخره حاتتحاسب عن حق الملايين
يا ترى حاتنسى اننا حانكون لك مختصمين عند رب العالمين
يا ترى حاتنسى ان النار تنتظرك وانت من الغافلين
يا ترى حاتنسى ان الجنه يدخلها الاتقياء المؤمنين
يا ترى انت حاسب نفسك منهم ولا من المتكبرين
اكيد لازم تعرف ان الله هو العدل الحكم الحسيب
وبحقنا كلنا متمسكين فى رقبتك انت يا مسكين
_____________________________________________________

رسالة من مبارك الى شعب مصر الحبيب
ياشعبي حبيبي ياروحي يابيبي ياحاطك في جيبي يابن الحلال
ياشعبي ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
ياشعبي اللي نايم وسارح وهايم وفي الفقر عايم وحاله ده حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال
واحب اللي ينصب واحب اللي يكدب واحب اللي ينهب ويسرق تلال
واحب اللي شايف وعارف وخايف وبالع لسانه وكاتم ماقال
واحب اللي قافل عيونه المغفل واحب البهايم واحب البغال
واحب اللي راضي واحب اللي فاضي واحب اللي عايز يربي العيال
واحب اللي يائس واحب اللي بائس واحب اللي محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان مطش كوره وفيلم ومقال
واحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها حجيبك لايمكن اسيبك وراح تبقى عبره وتصبح مثال
حبهدل جنابك وادل اللي جابك وحيكون عدابك ده فوق الاحتمال
وامرمط سعادتك واهزأ سيادتك واخلي كرامتك في حالة هزال
وتلبس قضيه وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجيبلك جمااااال
____________________________________________________

[size=18]بحلم أعيش إنسان [/size]